Vanlege folk sin tur til å bli flådd?

Slagordet «vanlege folk sin tur», blei gjentatt på inn og utpust av Arbeidarpartiet gjennom heile valkampen. Det blei også lova at ingen med inntekt under 700.000, skulle få auka skatt med regjeringa sitt skatteopplegg.

Men kva er vel denne vinterens straumpris, om ikkje ekstra skatt? Over 90% av norsk kraftproduksjon er eigd av kommune, fylke og stat. Den auka straumprisen er ikkje eit resultat av auka produksjonskostnadar, det går rett inn på overskotet til kraftselskapa, som i all hovudsak er eigd av stat og kommune. Stat og kommune sit igjen med overskotet. Regjeringa reknar med at statens inntekter med den høge straumprisen er 30-40 milliardar kroner. I realiteten er dette ikkje noko anna enn ein auke i skatten, som rammar blindt uavhengig av betalingsevne.

Kommunestyret vedtok før jul at ordføraren skulle senda brev til statsministeren og sei at noko må gjerast for å redusera byrden knytt til straumprisen. Men samtidig som vanlege folk slit med skyhøge straumrekningar, håvar kommunen inn svære beløp på nettopp høg straumpris. Vi vil derfor minne den sitjande koalisjonen beståande av AP, Høgre og Sosialistisk Fellesliste på, at på same måte som staten kan gjere grep, kan kommunen også gjere grep. Ved å bruke noko av dei ekstraordinære inntektene kommunen har, på sal av straum og utbyte frå kraftselskapa og kraftfondet på å innføra et betydeleg botnfrådrag på eigedomsskatten. Då kan ein faktisk gje ei handsrekning, i ei tid der mange slit med å betale rekningane sine.

Dersom ordføraren ikkje vil sjå på dette, kan det berre forståast som at engasjementet for dei som slit med å betala rekningane sine, er eit reint spel for galleriet.