Uskedeling vart minna på Viking-kamp

Rune Magne Nilsen gjekk bort natt til førre måndag. Den velkjende uskedelingen ville ha blitt 68 år den 10. oktober. Rune hadde ein spelarkarriere som ingen uskedelingar kan måla seg med, og etter at skoa blei lagt på hylla, har han vore ein markant person i fotballmiljøet i Stavanger-området. Hovudsakleg knytt til hjarteklubben hans Stavanger IF, der han spela tett på 300 kampar og var ein naturleg kaptein. Det var ei legende i Stavanger-fotballen som blei minna under Viking-kampen søndag.

Kjempa om opprykk

Rune viste seg tidleg som eit fotballtalent utanom det vanlege. Alt som 15-åring reiste han til Bryne for å kombinera fotballen med skulegang. På den tida var Bryne ein toppklubb i Norge med spelarar som Arne Larsen Økland, Rune Ottesen og Gabriel Høyland. Det resulterte i at Rune spela på Rogaland sitt juniorkretslag mot sine tidlegare medspelarar på aldersbestemte kretslag frå Sunnhordland krets. Der hadde han tidlegare blitt framheva som ein av dei beste spelarane saman med broren Geir.

Etter tida i Bryne blei han henta til Stavanger IF, som på den tida hadde eit svært godt lag på øvre halvdel på tabellen på nivå 2. Enkelte sesongar kjempa dei til og med om opprykk til toppdivisjonen. Det var dette som blei klubben i Rune Nilsen sitt hjarta, og der blei han ein bauta gjennom mange sesongar som spelar og kaptein, og etter det i støtteapparatet.

Ynska av Viking

Prestasjonane i SIF var så gode at han blei sterkt ønska i forsvaret til storebror Viking. Tilbodet var klart til signering. Sjølv om det freista veldig, takka han nei. Han oppgav to grunnar til det. Lojaliteten til SIF der han var kaptein, og ein travel arbeidskvardag med etablering av eige firma.

– Men Viking kom godt ut av det. Dei signerte Bjarne Berntsen, sa han til meg ein gong.

Rune skulle likevel koma tett på A-laget til Viking. Sonen, Harald Nilsen Tangen, har som kjent vore ei sentral brikke på dette laget dei tre siste sesongane.

At Rune Magne Nilsen var ein markant person i Stavangerfotballen kom tydeleg til syne under Viking-kampen mot Sandefjord på søndag. Ei stor supportergruppe mintest fotball-legenda frå SIF og Uskedalen, med eit stort banner. Det fortel mykje. Det var ei flott markering; sterkt og rørande.

Klubben i hans hjarta, SIF, vil heidra legenda ytterlegare når dei spelar seriekamp komande fredag, same dag som Rune blir bisett i Stavanger krematorium.

Ofte i heimbygda

Sjølv om Rune reiste tidleg ut, har han aldri gløymt heimbygda og uskedelingane. Også resten av familien med dei fem borna er blitt glade i Uskedalen. Det var tett mellom turane hans, og det verka som han elska det. Han hadde alltid god tid til å slå av ein prat. Ofte med fotball som eit av temaa, men også andre ting. Alltid humørfylt. Også denne sommaren besøkte han heimbygda med god hjelp. Mange uskedelingar har gode minne frå dette.

Thor Inge Døssland