Tilknyting E-39 for Kvinnherad – Huglo – Hodnaneset

Viser til mitt innlegg i lokalavisene om tilknyting til E-39 Hordfast som er under arbeid og venteleg vil vera på plass rundt slutten av dette tiåret. Det er som mange har poengtert at det er av største viktigheit at Kvinnherad knyter seg opp mot dette sambandet, som vil vera det største som har hendt nokon gong innan samferdsle i vårt område.

Skulle vi ikkje lukkast med tilknyting til dette sambandet, som med tid vil knyta kysten saman mellom Oslo og Trondheim, vil Kvinnherad saman med Austevoll vera den einaste Sunnhordlandskommunen utan samband.

Det er derfor av aller største viktigheit at vi evnar å få dette til. Det har etablert seg eit pådrivarselskap, Sunnfast AS, som har tatt på seg ei oppgåve å få dette til. Men dessverre har dette låst seg i ei løysing med flytebru over Husnesfjorden, og vidare bru over Laukhammarsundet og Sjeleviksundet.

Uheldige sider

Beklagelegvis har denne løysinga ei rekkje uheldige sider som:

Kostnaden med anlegget er svært høg, og lar seg neppe finansiera. Uttale frå Helge Hopen og Fylkeskommunen talar sitt tydelege språk.

Anlegget er kostnadsrekna til rundt 10 milliardar, og i tillegg er brua foreslått landa på eit freda område på Huglo, noko som er svært så tvilsamt. For å unngå dette må brua forlengjast, noko som inneber ein tilleggskostnad på rundt 700 millionar. Både trafikk og bompengetakst er sett høgt, etter mi meining over det ein kan forventa. Sjølv med dette må kommunen trå til med lån på 100 millionar. Etter mi meining må dette bli langt høgare.

Det er liten erfaring med flytebruer i dette landet, eg kjenner til to, begge blei 50% dyrare enn kalkulert. I tillegg er vedlikehaldskostnadene svært høge, sjå berre det som skjer på Nordhordlandsbrua no om dagen. At kommunen skal ha eit finansieringsansvar i dette er utenkjeleg. Riks- og fylkesvegar er ikkje kommunane sitt ansvar. Kommunen burde ha meir enn nok.

Anlegget vil krevja ei rekkje godkjenningar. Å stengja Hardangerfjorden er ei sak som vedkjem fleire enn Kvinnherad kommune; alle kommunar i Hardangerfjorden må sjølvsagt få eit ord med i laget.

Dei som har sine inntekter frå turisme og har satsa utifrå dette, vil bli skadelidande. Vi har funne ut at Hardanger har hatt besøk av skip inntil 345 meters lengde, og ei rekke skip rundt 300 meter. Spørsmålet er: Planlegg Sunnfast at desse skal gå gjennom Laukhammarsundet?

Likeins må både forsvaret og kystverket godkjenne dette. Det føreligg ingen informasjon om at saka er førelagt nokon godkjennings-etat.

Nytt forslag

Etter mitt innlegg i lokalpressa har fleire kontakta meg, og det er kome fram forslag som er svært interessant som vedlagte skisse viser. Med utgangspunkt i Halsnøytunnelen, og med påhogg frå Huglo og endestasjon på Hodnaneset. Dette blir ein miljøtunnel sidan ein slepp opp- og nedstigning. Tunnelen blir dermed trafikksikker utan sidevegar, med unntak av til/frå Huglo, og blir såleis energisparande.

Total lengde ca. 17.7 km, og ein pris på rundt 3,7 – 4,0 milliardar kroner, altså ca. ein tredjepart av Sunnfast AS sitt prosjekt.

Prisen på tunnelen er bygd på Statens vegvesen sine prisanslag. Det har blitt bygd hundrevis av tunellar i dette landet, og ein kan med stor sikkerheit seia prisen.

Ein slik tunell kan finansierast med tilskot frå staten grunna innsparte midlar frå drift av ferjer og hurtigbåtar i området, samt låneopptak som kan tilbakebetalast over 20 år med langt lågare takst enn Sunnfast AS har i sitt forslag.

Sunnfast AS sitt forslag bør snarast leggjast dødt, og ein må så snart som mogleg samla kreftene til noko som er realistisk.

Gerhard Eide med fleire