Takk til politikarane i Kvinnherad: – Dette har vore ein god dag

12. desember 2024 var det kommunestyremøte med budsjettvedtak. I dag vil me gje ros til våre kompetente, framsynte og lyttande politikarar. Dette har vore ein god dag. Kommunestyret har, mot kommunedirektøren si innstilling, vedteke at kommunen skal betale for arbeidstøy til sine tilsette. Dei har òg løyvd 2,5 millionar kroner årleg til eit prøveprosjekt for å auke grunnbemanninga i barnehagane i Kvinnherad.

Dette er to viktige hjartesaker Utdanningsforbundet har arbeidd med over lang tid. For å få til varig endring må ein ta seg tid. Me er glade for at me endeleg har fått eit budsjettvedtak som anerkjenner arbeidstøy som ei viktig sak for dei tilsette.

Valt å lytta

Me er òg svært glad for at politikarane har valt å lytta til dei som har kvardagen sin i barnehagen, og teke oss på alvor når vi har sagt at vi treng fleire tilsette. Korleis dette skal organiserast, har kommunedirektøren fått ansvaret for. Kommunedirektøren skal utarbeide nærare kriterium for tildelinga basert på barnehagefaglege vurderingar. Me ser fram til at dette arbeidet vert sett i gang, og er klare til å delta om det er ynskjeleg.

Takk igjen til politikarane for å ta desse viktige grepa for å betre arbeidsvilkåra og kvaliteten i barnehagane våre.

«Det er jul og det er lov å ynskje seg til jul», sitat frå kommunestyresalen. Me har fått det me har ønska oss aller mest til jul.

Gledeleg helsing frå

Utdanningsforbundet

v/ Hovudtillitsvald Bodil Fjeldstad Stoknes