– Symjeopplæringa må styrkast!

Foreldreutvala ved samtlege skular og barnehagar som soknar til bassenget i Rosendal slår alarm om symjeopplæringa. Dette gjeld våre barn og det gjeld tryggleik. Kvinnherad har vatn på alle sider, og borna i Kvinnherad må få fyrsteklasses tryggleik og opplæring i vatn. Symjing er det faget i skulen ein kan døy av å ikkje meistre. Lær borna å symje!

Kvinnherad har ei enorm kystlinje, samt elvar og store vatn nær bustader, skuleveg og friluftsområde. Vi slår alarm om nedskjeringane som er vedtekne frå hausten 2021.

Kvinnherad kommune sine politikarar seier bassenget ved Rosendal skule vert ope frå 18.09-01.04, og tida kvart enkelt klasse er i bassenget vert avgrensa. Dei minste borna (2.klassen) ender opp med kun fem gonger i bassenget. 4.klassingane får 20 gonger i bassenget. Der er nedskjeringar ved alle bassenga i kommunen. I 2017 kunne 53% av borna symje 200 m ved utgangen av 4. klasse. No i 2020 var talet 41%. Unntaksåra med korona har ytterlegare forhindra symjing i skule og fritid. Etter 4.klasse seier kompetansemåla at borna skal vere symjedyktig ved å falle uti på djupt vatn, symje 100 meter på magen, og undervegs dykke ned og hente ein gjenstand med hendene, stoppe og kvile i 3 minutt (imens flyte på magen, orientere seg, rulle over, flyte på rygg), så symje 100 meter på rygg og ta seg opp på land. Faren ved å vere borte frå basseng i det heile i over eit år mellom 2. og 3. klasse er vesentleg. Vasstilvenning kan måtte byrje på ny. Skulen skal også tilpassast ulike born og forutsetningar.

Kommunen seier dei har kvalitetssikra planen med Norsk symjeforbund og Svømmedyktig.no, men Foreldreutvala vil spørje om politikarane som har vedteke denne innsparinga å symjeopplæring nokon spørsmål:

Kor realistisk er det at borna oppnår kompetansemåla i læreplanen etter 5 gonger i bassenget ved utgangen av 2. klasse? Kompetansemåla er dykke, flyte, gli, skape framdrift, hoppe uti og orientere seg i vatn.

Skulen skal sjølv ha kompetansen på tryggleik ved sjø og vatn. Korleis sikrar kommunen at ein har tilstrekkeleg ressursar til dette? I skuleåret 2020/2021 hadde vi erfaring frå elevane våre at dei ikkje har kunna gå på tur til vanlege utflukter eller i skogen fordi dei ikkje har to lærarar/assistentar som kan vere med, som er eit krav. Vil ikkje dette vere vanskelegare når også desse lærarane skal vere personar med livredningskompetanse ?

Skulen skal vere sosialt utjamnande. Born kjem frå familiar med ulike ressursar. Dette gjeld born født i Norge og born født i utlandet. Born som er født i utlandet eller har utanlandsfødde foreldre, har gjerne mindre symjeopplæring med seg frå landet dei kom frå. Har de nokon statistikk på om dei har utbytte av den symjeopplæringa skulen gir? Er ikkje skulen si symjeopplæring endå meir kritisk for desse gruppene? Dei ressurssterke foreldra med tanke på tid, pengar og Fleksi-tid kan kanskje få til familiebading og tur til sjø, men ikkje alle får det til.

Deler av symjeopplæringa kan og bør skjer ute. I denne planen er det kun 2. og 4. klasse som får tilgang til bassenget i småskulen. Der er berre lagt opp til ute-symjing i 2. og 4. klasse. Korleis skal vi sikre kontinuitet i vasstilvenning og tryggleik med over eit års pause?

Vi er bekymra for borna våre i denne kommunen. Vi har vatn på alle sider, og de vil spare pengar på å skrenke inn den livsviktige symjeopplæringa. Kommunepolitikarane er nødde til å snu i denne saka! Vi har ingen born eller vaksne å miste!

Marit Bakke, Leiar FAU Omvikdalen Skule

Lene Vangberg Monsen, Leiar FAU Omvikdalen barnehage

Oddmund Lunestad, Leiar FAU Uskedalen barnehage

Isabell Stensletten, Leiar FAU Uskedalen Skule

Kjell Harald Tungesvik, Leiar FAU Dønhaug Gardsbarnehage

Signe Bondhus Jensen, Leiar FAU Mauranger oppvekstsenter

Solrun Saghaug Vågen , Leiar FAU Åkra Oppvekstsenter

Lise Egeland, Leiar FAU Rosendal FUS barnehage

Anne Lamberg Opsahl, Leiar FAU Malmanger skule