Stopp ferjekutta i Kvinnherad!

Fylkesdirektøren i Vestland føreslo nyleg å kutta i to ferjetilbod i Kvinnherad. Sjølv om forslaget vart trekt attende, er det igjen blitt aktuelt i samband med den komande anbodsprosessen.

Dette er ikkje berre eit spørsmål om budsjett og ressursar – det er eit angrep på grunnleggjande kommunikasjon og livskvalitet for innbyggjarane våre. NAF Haugesund og omegn - gruppe Kvinnherad ser alvorlege konsekvensar av desse kutta, og vi kan ikkje akseptere at fylket set livsnerva til våre lokalsamfunn i fare.

Ferjene er ikkje berre eit transportmiddel; dei er fundamentet for kvardagen til mange. Kutta vil ramme særleg hardt for øysamfunna, der ferja er den einaste tilkomsten til omverda. For desse innbyggjarane betyr færre avgangar meir isolasjon, større utfordringar med å nå jobb, skule og helsetenester – og ein kvardag der det meste må planleggast rundt ein ferjetabell som blir stadig meir avgrensa. Er dette eit akseptabelt liv for dei som bur på desse øyane?

Må engasjera seg

Men det handlar ikkje berre om innbyggjarane på øyane. Kutt i ferjetilbodet vil også gjera Kvinnherad mindre attraktivt som ein stad å bu og arbeida. Dårleg kommunikasjon hindrar folk frå å flytte til kommunen, og det gjer det vanskelegare for bedrifter å rekruttere arbeidskraft. Lokalt næringsliv som er avhengig av stabile transportløysingar vil lide, og ringverknadene kan bli store for heile kommunen.

Vi i NAF meiner det er på tide å heve røysta. Lokalt næringsliv bør ta ansvar og bruke sine kanalar til å påverke politikarane i fylket. Innbyggjarane må engasjere seg – vi kan ikkje sitje stille og sjå på at viktige tilbod blir rasert. Dette er ikkje berre ei lokal sak; det handlar om heile fylket sitt ansvar for å sikre gode bu- og levekår i distrikta.

Vi krev at fylkesdirektøren og politikarane i Vestland tenkjer seg grundig om. Å kutte i ferjetilbodet i Kvinnherad er ikkje ei berekraftig løysing – det er ei nedprioritering av menneska som bur her. Skal heile fylket leve, må heile fylket bli høyrt.

NAF Haugesund og omegn gruppe Kvinnherad

Karl Petter Vårdal - Leiar gruppe Kvinnherad