Statnett si 420 kV-linje: No går fristen ut

16. januar er fristen ute for å gi uttale til NVE om 420 kV-linja tvers gjennom indrefileten av natur og kultur i Kvinnherad. Det er viktig at trykket mot NVE om å få utgreidd trasé vi vil ha, må bli så sterkt som mogleg.

Rosendalstiftinga har skrive ein solid uttale, den kan alle få tilgang på om du ynskjer. Dersom du vil gi uttrykk for meininga di, men ikkje har høve, eller føler du ikkje har nok kompetanse, så kan du vera med på uttalen underteikna har skrive. Fleire har signalisert at dei vil signera denne uttalen, og vi opnar for at du òg dersom du ynskjer, kan vera med og signera dette skrivet. Då må du melda frå på e-post til sigurd@vikorenmedia.no, på Messenger eller SMS innan klokka 18 onsdag 15. januar.

Om du heller vil kan du bruka dette skrivet sjølv og senda inn til Norges vassdrags- og energidirektorat, Postboks 5091, Majorstuen, 0301 Oslo, E-post: nve@nve.no. Hugs fristen 16. januar.

Uttalen

Rosendalstiftinga har presentert ein solid og utfyllande høyringsuttale. Den viser grunnlaget som vår uttale er bygd på. Våre krav er dei same som går fram av Rosendalstiftinga sin høyringsuttale.

Krav om utgreiing av tunell-alternativ frå Omvikdalen til Årsnes, og utgreiing av sjøkabel frå Årsnes til Dimmelsvik.

Rosendal og omland har status som eit av Noreg sine mest verdfulle natur- og kulturområde, det krev respekt. I respekt for vassdragsvern, kulturminnevern, nasjonalpark og landskapsvernområde. I respekt for kulturlandskap og strenge kulturhistoriske vern etter norsk lov, ikkje minst av Baroniet Rosendal med bygningar og kringliggjande areal. I respekt for alle dei som dagleg etterlever Stortinget sine vedtak og dei lovpålagde vern i sin kvardag.

I ljoset frå desse realverdiane finn vi ingen grunn til å gi nokon kommentar til forslaga som er melde til NVE av Statnett, av den enkle grunn at dei er i grunnleggjande konflikt med all vernestatus for Rosendal og omland. Statnett sine melde trasear for luftlinjer er heilt uakseptable.

Det er sjølvsagt prinsipielt viktig at Staten sitt eige selskap føl same lover og reglar som Staten har pålagt alle andre som er ein del av dette verdfulle området, og som difor må ha ei respektfull framferd, slik alle dei nasjonale verneverdiane krev.

Gode løysingar

Vi forstår at Statnett har eit viktig samfunnsoppdrag. Det har kvinnheringane òg, vi er sett til å hegna om at dei ulike verna blir respektert og etterlevd.

Berre dersom NVE pålegg Statnett å utgreia alternativ som tek omsyn til alle statlege vern, og kva ynskjer kvinnheringane har for framtida, gjev det oss grunnlag til å velja det beste alternativet når den tida kjem.

Det interessante i denne samanheng er at det finnest gode løysingar som ivareteke alle partar sine oppdrag og ansvar. Difor må det utgreiast tunell-prosjekt frå Omvikdalen til Årsnes, og det må utgreiast ulike alternativ for sjøkabel, slik at vi kan vurdera kva som tenar heilskapen best.

Basert på det vi veit i dag, vil melde luftlinje-trasear vera konfliktfulle og heilt utan berekraft. Sjøkabel eller tunell vil derimot vera samfunnsøkonomisk gode prosjekt. Prosjekt som gjev tryggleik for levering av straum, samstundes som vi tek vare på alle verdiane i eit av Noreg sine mest verdfulle kultur- og naturområde.

Rosendal 15. januar 2025.

Sigurd Vikøren