Spørsmål til ordføraren

I kommunestyremøte 20. februar 2020 stilte underteikna spørsmål om bruk av plast/gummigranulat på kunstgrasbanane i Kvinnherad. Ordføraren svarte med at det var sett i gong eit arbeid i påvente av den nye forskrifta, «forskrift om begrensning av forurensning (forurensningsforskriften), del 6, kapittel 23A, uforming og drift av idrettsbanar der det blir brukt plastholdig løst fyllmateriale».

Den nye forskrifta er no vedtatt, og trer i kraft 1. juli 2021.

I svaret viste også ordføraren til ei ressursgruppe som jobbar med Hold Norge Rent. Dessutan blei det vist til at det vart sett av midlar i investeringsbudsjettet for å kunna imøtekoma utfordringane/krava i den nye forskrifta.

Med stor forundring la fleire innbyggjarar, mellom dei mange skuleelevar, merke til at det blei lagt ut nytt gummigranulat på kunstgrasbanen i Rosendal i inneverande veke (veke 16). Eg er klar over at forskrifta ikkje er tredd i kraft enno, men det er ein svært dårleg signaleffekt ovanfor den oppveksande generasjonen at kommunen ikkje synes å ta miljøspørsmål på alvor?

Det er alltid lov å ta framtidsretta løysingar i bruk, sjølv om ein formelt sett ikkje bryt gjeldande lover/forskrifter.

Spørsmåla mine er:

1. Kor langt er Kvinnherad kommune komen i planlegginga av det som blir krav for alle kunstgrasbanar frå 01.07.21?

2. Kvifor blei det ikkje brukt eit meir miljøvenleg alternativ enn gummigranulatet som no er nytta i Rosendal, og kven tok avgjerda om å nytta gummigranulat som medfører store utslepp av mikroplast til naturen?

3. Har det blitt vurdert etter §23A-9, substitusjonsplikt, om det er andre alternativ enn det brukte gummimaterialet?

Seimsfoss, 25. april 2021

Matthias Zimmermann

MDG Kvinnherad