Skulestruktur

Dei folkevalde står føre og skal drøfte og seinare ta avgjerd over Kvinnherad kommune si framtidige skulestruktur. Dei folkevalde har fått seg førelagd tre ulike framlegg frå sekretæriatet, (les også administrasjonen). Eg brukar omgrepet folkevalde for å poengtere at dei nettopp er folkevalde, og har som oppgåve å målbere det demokratiske folkefleirtalet sin vilje.

Alternativ 0 er ingen endring, og skulestrukturen blir verande som den er i dag. Dei andre alternativa 1 og 2 er forholdsvis omfattande endringar med endring av skulekrinsar, nedlegging av skular, samanslåing og nybygg.

For Sunde, den skulekrinsen underteikna er busett i, så vert den etter forslag 2 å leggjast ned både skulen og barnehagen.

Samstundes med sak om skulestruktur står det for tida å lese i lokalavis over to sider den 16. april og på framsida «Vil utvikla Sunde», der ein omtalar og som viser til arbeidet med områdeplan og ein mogeleheitsstudie som er utarbeidd av konsulentfirmaet Norkonsult. I avisa gjev prosjektleiar Anne Lise Næs uttrykk for at ho håpar på stort engasjement blant sundebuane frametter. Ikkje til å klandre Anne Lise, men du snakkar meg om, «å dra til ein person på tryne og be om hjelp etterpå». Nei, eg trur at alt engasjementet til sundebuen for tida vil gå med til å freiste å berga skulen og barnehagen.

Mogelegheitsstudien føreslår ulike spenstige idear for Sunde som blant anna hotell, butikkar, strandpromenade og badestrand (luftslott?).

Eg er overbevist om at skulen og barnehagen har større verknad på folk si trivsel, og vil vera tilflyttarar til Sunde meir enn ein strandpromenade og badestrand.

Sunde Grendalag vart stifta 9. mars 1981 då ein drøfta generalplan med spenstige idear for Sunde med generalplanleggjar Handegard, som var til stades frå kommunen, blant anna forslaget om å erstatte badestrand som vart nedbygd då ein bygde nytt ferjestø i Opsangersneset. Det er no 40 år sidan, og badestrand har ein ikkje fått på plass om den har stått på saklista til grendalaget sidan då.

Grendalaget og kommunen har likevel gjort mykje anna positivt gjennom denne tida. Nemner trafikksikring ved skulen, kystkulturdagar, kystkultursenter o.a. I 1991 var det sak i Kvinnherad kommune at ein ville satse på å utvikle Sunde som «Kommunen sitt satsingsområde som senter for kystkultur», og vart vedteke som sak i formannskapet 16. mai 1991. Tilsvarande som Rosendal er kommunen sin satsingsstad for reiseliv og Husnes er satsingsstaden for industri og utdanning, no seinare som regionsenter.

Då igjen til saka om skulestrukturen og nedlegging av Sunde skule og barnehage. Som del av satsinga Sunde som Kvinnherad kommune sitt senter for kystkultur inngår historia og formidlinga om at Sunde er hermetikkindustrien si vogge, og at fabrikkane på Sunde var dei første av hermetikkindustri verksemdene i Norge. Vidare at Gravdal Skipsbyggeri var det største treskipsbyggeriet i landet ved i epoke. I denne samanheng er samarbeidet med skulen heilt sentralt, då det er desse borna som skal ta til seg kunnskapen og igjen skal formidle denne historia vidare til nye generasjonar. Dette er også i tråd med identitetsskapinga for elevane knytt til staden og som igjen er i tråd med kunnskapsløfte like etter Hernes som kunnskapsminister.

Skulen er sjølvsagt til for elevane si læring og skulen skal stå for turvande kvalitet. Ein kjem likevel ikkje forbi at også skulen og barnehagen har ei vidare samfunnskostnad (-verdi) om den er til stades eller ikkje.

Oppmodinga ved dette lesarbrevet er at de folkevalde må evna å sjå ein betre heilskap vedrørande skulestrukturen enn det sekretæriatet ved fagfolka i si utgreiing og innstilling legg for dagen her.

Einar Saghaug