Samferdsel i Kvinnherad - tilsvar til Arne Leite, varaordførar i Tysnes

Ref. til debattinnlegg i avisa Kvinnheringen frå Arne Leite publisert den 3. august 2023.

Ein må stilla spørsmål ved kva geografikunnskapar varaordførar i Tysnes, Arne Leite (Sp), har når han påstår at ein kan redusera seglingsdistansen til det halve med å flytta ferjesambandet Ranavik - Skjersholmane til Sunde - Jektevik. Oppmålinga utført i Fonnakart viser at seglingsdistansane er nærmast identiske med få hundre meter forskjell! I USA kallar dei å presentera løgner som «Fake news».

Vidare skriv Arne Leite, sitat: «Ved å ha fleire ferjer i bruk på samanknytte samband vert både beredskapen og opningstida betre. Og, som ein rein bonus, vert Tysnes og Kvinnherad endå tettare knytte saman». Er det vidareføring av tidlegare Kvinnherad Sp-ordførar Myrvold sin lanserte plan?

Dette kan ikkje forståast på annan måte enn at ferja også skal inngå i eit trekant- eller firkant-samband med Sunde, Hodnanes, Huglo og Jektevik, og dette går heilt klart utover eit effektivt samband.

Ei bjørneteneste

Dei same sviktande geografikunnskapane kan ein tilleggja ordførarane våre i Stord, Tysnes og Kvinnherad, som i fellesbrev (u-datert) sendt over til Vestland fylkeskommune i april/2023.

I brevet påstår dei at dei vil få korta inn reisevegen mellom Stord og Kvinnerad, byggja saman Sunnhordlandsregionen, og utvida bu- og arbeidsregionen monaleg, og samtidig få sikra finansiering til også å byggje bru frå Huglo til Skorpo ved å laga eit nytt ferjesamband frå Husnes til Huglo.

Brevet kan ikkje sjåast på anna som ei bjørneteneste for bevaring av den samferdselbakevja Kvinnherad er i, og som er eit stort hinder for næringsutvikling og vekst i kommunen!

Forslaget i brevet er: Eit nytt ferjesamband frå Husnes til Huglo, vidare ny veg/tunnel til Stord sitt planlagte Huglo-samband, med bru over Laukhamarsundet, einfeltveg med møteplassar inn til og over brua i Skjelleviksundet, vidare nordover på FV5076/549 til Økland, for så å køyra nye E39 tilbake til Hodnanes og over den framtidige E39-brua over Langenuen og vidare sørover til Leirvik/Stord.

Bompengar

Kostnadane vil bli skyhøge med to nye ferjestø med ladestasjonar, framføring av vegar og ladestraum, bru over Laukhamarsund og oppgradering av veg/vegbreidder på Skorpo til køyrehastigheit kapasitet på 80 km/timen. Realiseringstida av dette er òg heilt avhengig av at Hordfast blir bygd fyrst!

I tillegg må ein også betala Hordfast-bompengar for å koma seg til/frå Stord over E39!

Eit framtidig ferjefritt samband «Sunnfast» i dei same ferje-traséane er heller ikkje godkjent av Kystverket, ref. Kystverkets tilbakemelding i brev, datert 3.10.2022, til Statens vegvesen.

Sunnfast ferjefrie samband kan då ikkje brukast som argument/brekkstang for å laga eit nytt midlertidig ferjesamband over Husnes-fjorden i same trasé. Dette kan heller ikkje seiast å vera innkorting av traseen mot Stord/Leirvik-området, og å knyta Sunnhordland saman slik påstått i brevet, men stikk motsett.

Traseen blir i utgangspunktet ca. 16 km lengre enn ei fullt mogleg innkorting av trasé med nytt ferjestø på Kvernanes-området over dagens eksisterande ferjestø på Ranavik målt frå Opsanger.

Direkte tunnel

Huglo-sambandet skulle blitt planlagt/bygd med direkte tunnel frå Huglo til Hodnanes på Tysnes, med framtidsretta tunnelprofil for å tilfredsstilla riksveg funksjonsklasse B, og dermed gi mogelegheit for eit framtidig ferjefritt fylkessamband mot Kvinnherad. Då hadde omvegen over Skorpo og inn til brua i Skjelleviksundet og tilbake blitt unngått og fleire kilometer spart.

Skal ein få bukt med å segla som eit «fantefølgje», som Arne Leite kalla det, så er eit nytt ferjestø på Kvernanes-området på Stord det einaste som er mogeleg til ein overkomeleg kostnad og tidsaspekt.

Dette i samsvar med Statens Vegvesen si tilråding i utgreiinga til Stord kommune i 2008, samt konsept 2 tilråding frå Helge Hopen AS i rapport frå 2018 til Kvinnherad kommune.

På traseen over Ranavik er det også mogeleg med ytterlegare innkorting av sambandet med å flytte ferjestø til Klosterneset/Ungholm, slik også planlagt i tidlegare kommunestyrevedtak. Dette dersom eit framtidig ferjefritt samband ikkje er mogeleg å realisera i overskodeleg framtid.

Utnytta mogelegheita

Eit nytt ferjestø på Kvernanes var i 2008 kostnadsrekna til 177 millionar NOK, og ligg klar med planskisser i utgreiinga. Statens vegvesen opplyste i sitt møte på Stord ved gjennomgåing av utgreiinga at Kvernanes var eit så godt samfunnsnytteprosjekt, med ein kalkulert netto samfunnsnytte på 243 mill. NOK over ein 25-års periode, og at prosjektet burde gjennomførast i løpet av den neste 2-åra om Stord kommune godkjente det!

Utgreiinga viste også at ca. 90% av dei reisande frå Kvinnherad skulle til Leirvik, Heiane og sørover!

Prosjektet burde no under alle omstende vore inkludert i den statlege reguleringsplanen for E39 Ådland til Os, der Statens Vegvesen i sine premissar for E39 er pålagt å laga gode på-knytingar til nabokommunar.

Men utnyttar politikarane i Kvinnherad denne mogelegheita til Statleg reguleringsplan? Eller blir Skjersholmane eit mellombels ferjestad i mange tiår til?

9. august 2023

Per Kristensen (samferdselsengasjert og listefyll for Frp)