Saman gjer vi ein forskjell

Konfirmantar, frivillige og tilsette i kyrkjelyder over heile landet er no i gang med å gjere ein forskjell, gjennom Kirkens Nødhjelp sin fasteaksjon.

Aksjonen har i år fått tittelen «Håp i ein drope vatn». For eit håp kan faktisk byrje med ein drope vatn! Vatn kan endre eit liv, ein landsby og eit land.

I vår kommune vil Fasteaksjonen bli gjennomført i løpet av veka, nokre stader ved bøsseinnsamling, andre stader digitalt. Ved å vippse til 2426 er du med og støttar Fasteaksjonen, og beløpet du gjev blir automatisk registrert på det soknet du bur i, og inngår i det innsamla resultatet for konfirmantane i soknet.

Tilgang til reint vatn gjev positive ringverknader. Vassborne sjukdomar blir reduserte, og reint vatn fører til betre helse. Vasstilgang gjev også bøndene moglegheit til å effektivisere jordbruket. Smarte dryppsystem gjev moglegheiter for tredobling av inntektene, og gjer også bøndene betre rusta mot klimaendringar. Det er håp i ein drope vatn!

Fasteaksjonen gjev Kirkens Nødhjelp handlingsrommet ein treng for å forandre liv på sikt, men også moglegheit til å redde liv i akutte kriser og katastrofar. Takk vere innsamla midlar frå mellom anna fjorårets fasteaksjon, hadde Kirkens Nødhjelp moglegheit til å gje akutt nødhjelp til flyktningar då krigen braut ut i Ukraina for over eit år sidan. I Syria gjev Kirkens Nødhjelp katastroferespons til jordskjelvråka i form av mat, vatn, hygieneartiklar og teppe. Skular, kyrkjer og moskear gjev husly til mange huslause. Samarbeid med lokale partnarar gjer rask respons morgleg, når kriser og katastrofar inntreff.

Dugnadsånda og gjevargleda som kjem til syne gjennom Fasteaksjonen bidreg til å skape håp og forandring verda over. Saman gjer vi ein forskjell!

Åse Selsvold

Sokneprest i Husnes og Holmedal sokn