Regnbogeflagget

Regnbogeflagget har i det siste vore heist på mange offentlege bygg rundt i kommunane våre, også i Kvinnherad. Dette er mogleg fordi flaggloven no er endra. Regnbogeflagget er symbolet til Pride- rørsla. Bak Pride står organisasjonen FRI. Organisasjonen arbeider mellom anna for at menneske som bryt med normer for kjønn og seksualitet, sambuarar, einslege foreldre, fleirforelderfamiliar eller personar utan barn må vera inkludert i familieomgrepet. Organisasjonen FRI skal altså innta ein tydeleg posisjon i spørsmål knytt til kjønn, seksualitet, kjønnsuttrykk og negative verknader av heteronormativitet. Organisasjonen nemner og at det finst over 30 ulike kjønn. FRI sitt formål er eit samfunn der alle kan leva ut si seksuelle orientering, sin kjønnsidentitet og sine kjønnsuttrykk basert på likeverd og samtykke, utan fare for å bli diskriminert og/eller trakassert, skriv dei på nettsida si.

Me meiner at alle menneske har like stor verdi og skal behandlast med respekt. Men det FRI presenterer her, er i stor grad det motsette av det Partiet Dei Kristne (PDK) og mange andre organisasjonar i Norge står for i etiske spørsmål.

Partiet Dei Kristne (PDK) meiner derfor at regnbogeflagget heist på offentlege bygg IKKJE verkar samlande for land og folk. For flagget skal vera symbol for fellesskap. Me i PDK har då spørsmål om det no er fritt fram for å heisa ulike flagg på offentlege bygg, utan å gå inn på kva dei representerer?

Etter vårt syn kan det føra til eit enda meir splitta samfunn, utan respekt for trusfridom og ulike syn. PDK ynskjer derfor å reversere flagglova, og berre tillate at det norske og samiske flagget vert heist på offentlege bygg. Stem PDK i haust, og få ei endring på Stortinget!

Bjarnhild Lygre Sjo

Leiar PDK Kvinnherad