Raudt seier nei til Statnett sine monstermastplanar

NVE (Norges vassdrags- og energidirektorat) har invitert til ei offentleg høyring fram til 16. januar 2025 om Statnett sin søknad om å byggje ei ny 420 kV-kraftlinje på Vestlandet. Denne skal etter denne planen gå i luftspenn frå Sauda via Etne til Blåfalli i Kvinnherad, og vidare gjennom Ullensvang, Kvam, Samnanger, Vaksdal, Osterøy, Alver og Askøy til Kollsnes i Øygarden.

NVE saman med Statnett har arrangert folkemøte i desse kommunane om konsesjonssøknaden. Mange engasjerte folk har stilt opp. Det har vore mange kritiske røyster til desse planane. Raudt Hordaland har deltatt med lokale representantar på desse folkemøta, og har fylgjande kommentarar:

Danne presedens

1. Raudt Hordaland etterlyser ein nærare dokumentasjon frå Statnett om det reelle samfunnsøkonomiske behovet for å byggje desse nye linjene til mange milliardar kroner. Vi krev svar på fylgjande spørsmål: Skal linjene levere vasskraft til elektrifisering av sokkelen? Kva slags konkrete industrieventyr langs kysten vår er det behov om å levere meir straum til? Kva blir konsekvensane for den kraftforedlande industrien og anna næringsliv i indre strøk for denne kraftoverføringa til kysten og ut i Nordsjøen? Kva vil kommunane langs denne traseen sitte att med?

2. Raudt Hordaland etterlyser ei alternativ vurdering og grundige, uhilda utgreiingar av linjetrasear som er meir skånsame utifrå natur, miljø- og friluftsinteresser og kulturminne.

3. Raudt Hordaland etterlyser grundige, uhilda utgreiingar av linjekablar i jord, sjø og fjell i staden for luftspenn på heile eller deler av denne strekninga, og alternative økonomiske utrekningar utifrå framtidig vedlikehaldsbehov og eit livsløpsperspektiv.

4. Raudt Hordaland vil òg peike på at det ut frå beredskapsomsyn (mellom anna ekstremvêr, ras- og skredfare og ising, samt krigsfare) vil vere sikrare å byggje framtidig linjenett i jord, fjell og sjø framfor i luftspenn.

5. Statnett nytta jordkabel i Bærumsområdet. Etter Raudt Hordaland sitt syn bør dette kunne danne presedens for denne type linjeutbygging i konfliktfylte område.

Valkampen

6. Det enklaste og kortaste vegen for deler av denne linjeutbygginga går via Bergen (alternativ 1). At dette alternativet er det kortaste, vil påverke kostnaden ved denne utbygginga, samt at det vil spare store område av fri, urørd natur og naturreservat. Frå eit samfunnsnyttig perspektiv, vil etter Raudt Hordaland sitt syn dette alternativet lagt som jord- og sjøkabel vere langt å føretrekke framfor rasering av store natur- og friluftsområde, slik dei alternative føreslegne traseane vil forårsake.

7. Raudt Hordaland vil utfordre Statnett til å klargjere om det vil bli stilt krav om at det skal vere norske leverandørar med landsdekkande norske tariffavtalar som skal utføre bygging av denne linja. Vi vil minne om at då Statnett bygde dei omstridde monstermastene gjennom Hardanger frå Sima i Eidfjord for ein del år sidan, vart ein stor del av jobben utført av underbetalte kroatiske linjemontørar.

8. Raudt Hordaland vil i neste stortingsperiode på nytt ta initiativ til ei regelendring, der jord- og sjøkabel i staden for luftspenn blir hovudalternativet ved framtidig linjebygging i Norge. Då dette vart handsama i Stortinget i 2023, røysta Raudt, SV, MDG, V og KrF for - og Ap, Sp, H og Frp imot. Dette bør bli ei viktig sak i komande stortingsvalkamp.

Raudt Hordaland

v/ Torstein Dahle (leiar)