Raudt Hordaland støttar bondeopprøret!

2021 kjem til å bli ein merkestein i historia om landbruket i Noreg. Næringa har opplevd sentralisering, inntektstap, strukturendring og rasering over fleire tiår. Sidan 2013 har det vore særleg ille. Bøndene er vanlegvis tolmodige og lojale her til lands. Men i år skjedde det noko.

Bøndene betyr enormt mykje for oss. Ein snakkar gjerne om mattryggleik, og om sjølvforsyning i krise. Eller om alle årsverka som landbruket indirekte genererer. Om landbruket si rolle i distrikta – Kvinnherad er ein av dei største landbrukskommunane i Vestland. Om det å halda kulturlandskapet i hevd. Men eksistensen av eit levande landbruk betyr mykje meir. Fleire av entreprenørverksemdene i Kvinnherad er starta på gardane, og bransjen får dyktige anleggsfolk derifrå. Då vi snødde fullstendig inne i 2009, korleis skulle vegane blitt rydda så raskt utan bønder med traktorar? Då olja skulle utvinnast var mange av dei første oljearbeidarane bondesøner. Næringa har mykje større ringverknader enn det byråkratar og innsnevra karrierepolitikarar i hovudstaden nokosinne kan forstå.

Og ikkje minst: pandemien har vist oss kor sårbare vi er. Eg for min del ønsker at vi har mest mogleg matproduksjon i landet når neste krise treff oss. Frå jorde til fat. Produksjon og foredling.

Raudt meiner at vi ikkje kan pressa landbruksnæringa lenger. Næringa får smular, og prisane dei får for det dei produserer går jamt nedover. Det gjer også inntektene til bøndene. Raudt meiner at bøndene må få inntekter og vilkår som blir betre, ikkje dårlegare.

Vi må også ha eit verkeleg oppgjer med kjedemakta i daglegvarebransjen og innkjøpspolitikken deira. Folk kan tola å betala litt meir for maten, men viktigare: Reitan- og Johannson-familiane kan tola å tena ein del mindre på den. Vi kan leggja til rette for at bøndene får betalt for maten, om så berre det dei fekk for 20 år sidan. Då vert det mykje meir ålreit å vera bonde.

Gneisten #bondeopprør21 tende bål i glørne som har ulma stadig sterkare. Bønder over heile landet fortalte om ein kvardag som er vanskelegare og vanskelegare. Om gardar som held 10 eller 15 andre nedlagte gardar i hevd, ved å slå marka, men tener likevel ikkje ei anstendig inntekt. Om bønder som ikkje ser nokon som vil overta etter dei. Bønder som ikkje tør tilrå at nokon skal overta. For dei kan ikkje sjå at det er liv laga. For hardt. For usikkert.

Også i Kvinnherad har bøndene kneisa med nakken. Det er ein ny tone i røysta deira. Raudt støttar bondeopprøret. Når først opprøret er tend, når dei møter forståing og velvilje, når nytt håp blir vekka, då vert fallet desto større dersom det blir like ille i åra som kjem. Vert det ikkje ei heilt ny linje i jordbrukspolitikken no så er eg redd vi vil sjå eit endå større fråfall frå næringa. Kva slags vendepunkt vil 2021 bli? Eg trur at når dei elles trauste bøndene er vakna til opprør vil dei ikkje roa seg så raskt. Og då vil Raudt stå med bøndene, og vera dei første til å fremja landbruket si sak i Stortinget. For Raudt er kampen mot forskjells-Noreg den viktigaste saka. I dette ligg også støtta til bøndene. Vil du ha ny landbrukspolitikk, men også styrking av industrien, sterk politikk for betre arbeidsliv, mindre forskjellar, rettvis miljøpolitikk og profittfri velferd – då skal du røysta Raudt!

Gaute Lund

Stortingskandidat for Raudt i Hordaland