Privat omsorg i Kvinnherad

Det var ein interessant artikkel Kvinnheringen presenterte i veka som gjekk, om eldreomsorga i framtida. Det er òg interessant å registrera kommunedirektør Ragnhild Bjerkvik, sine synspunkt på privat omsorg. Ho trur at vi i større grad må sleppa til private omsorgstilbod i tida som kjem.

– Ein del tilbyr god hjelp, som til dømes med reinhald. Den einskilde bør tenkja gjennom om ein ikkje bør ta i mot litt hjelp frå private omsorgsfirma. Eg trur ikkje kommunen vil makta å hjelpa alle i framtida, seier kommunedirektøren i intervjuet med avisa.

Det same har vore sagt av fleire tidlegare, og viser at fleire og fleire no innser at det offentlege om få år, kanskje allereie dette året, ikkje vil greia å yta hjelp til alle som har behov for det.

– Befolkingspyramiden på sikt kan føra til at kommunen ikkje vil makta å tilby alle eldre i Kvinnherad like tenester, påpeikar Bjerkvik. Til dømes vil eldre i Åkra, på Varaldsøy og Fjelberg i framtida måtta risikera å ikkje få tilgang til dei same hjelpetenestene, som folk i meir sentrale delar av Kvinnherad får. Dette kan i alle fall bli konsekvensen, ifølgje kommunedirektøren. Det same problemet opplever dei aller fleste distriktskommunar her i landet. Men det er lita trøyst i at Kvinnherad ikkje er åleine.

I boka «Frå heim til heim» (Skimtvis forlag, 2016) tok fleire leiande personar innan pleie- og omsorgssektoren i Kvinnherad til orde for eit utvida samarbeid mellom det offentlege og det private i eldreomsorga. Vi er nøydde til å tenkja nytt og alternativt, sa tidlegare pleie- og omsorgssjef Leif K. Kongestøl i boka for fem år sidan. Han såg for seg at eldreomsorga i framtida i større grad vil føregå utanfor institusjonane. Kommunalsjef Gunn Tove Petterteig peika i boka på at det ikkje vil vera mogleg å driva eldreomsorga i Kvinnherad på same måte som i dag. Det vil ikkje ein gong vera nok arbeidskraft til å dekka behovet dersom vi held fram som no, sa Petterteig den gongen. To år tidlegare sa ho i eit intervju i Kvinnheringen at det må ein snuoperasjon til i eldreomsorga.

Med kommunedirektøren sin uttale i avisa no, i tillegg til uttalane frå fleire leiande personar innan pleie- og omsorgssektoren i Kvinnherad tidlegare, skal det bli interessant å følgja debatten i det politiske miljøet framover. Mange ser jo nesten alltid «rødt» når det er snakk om private tenester i offentleg sektor, og gjev klart uttrykk for at dei er i mot det. Både politikarar og nokon av dei som arbeider i sektoren likar ikkje privat initiativ. Dei meiner visstnok at det berre er det offentlege som evnar å ta seg av eldre og pleietrengjande. Difor er det heller ingen grunn til å vera for stor optimist på vegner av dei eldre. Eg fryktar dessverre at det vil gå i same duren nokre år til på grunn av motstanden mot private aktørar.

Det er elles hyggeleg å registrera at kommunedirektøren i intervjuet med Kvinnheringen nyttar høvet til å rosa initiativet for bygging av eit seniorsenter på Husnes, som ho meiner er eit framtidsretta tiltak:

– Det er eit veldig flott initiativ, og ein samlar eldre som kan hjelpa kvarandre på éin stad. I tillegg førebygger ein einsemd, noko som jo er i ferd med å bli ein stor folkesjukdom. I tillegg vil fleire leilegheiter for eldre på éin stad bidra til å redusera kommunen sine kostnader med hjelpetenestene, seier Bjerkvik. Vi som arbeider med seniorsenteret lever vi i spenning om kommunen også vil kjøpa to leilegheiter, slik det har vore sagt i kommunestyret ved fleire høve. Vi håpar det beste for prosjektet og seniorane sin del!

Kristian Hus