Pedagogisk utfordring for PTM-leiaren

I lokalavisene kunne vi nyleg lesa at utvalsleiaren i Plan- Teknikk og Miljø, (PTM) var uroa over ulik språkforståing mellom politikarar/administrasjon på eine sida og «bygdene» på den andre sida, særleg i skulesaka. Bygdene snakkar ikkje same språket som «oss politikarar og administrasjonen», kunne han melda. Med «bygdene» meiner han truleg vanlege folk. Etter at administrasjonen har brukt store ressursar på ei utgreiing som fortel kor elendig det står til med skulane våre, viser høyringsuttalane likevel at dei aller fleste bygder meiner å ha ein god skule, og ikkje minst ein trygg og sikker nærskule. Det er her det buttar litt imot for Ølvestveit.

Når bygdefolk meiner å ha ein god og velfungerande skule, stikk i strid med tingingsverket frå Norconsult, må det skuldast at dei ikkje forstår at dei har ein dårleg skule, og så trur dei at dei har ein god skule. Bygdene. Dei forstår med andre ord mindre enn politikarar og administrasjon. Dette uroar truleg utvalsleiaren sterkt, og han tek no til orde for at politikarane må bli flinkare til å snakka eit språk vanlege folk forstår. Dette blir garantert ei pedagogisk utfordring frametter, også for administrasjonen, men vil nok bli eit løft for oss vanlege folk.

Ein tanke kan og vera at bygdene skipar til studiegrupper ein gong i månaden med drøfting av politiske uttaler, framlegg og vedtak. Slike samlingar kan bygdefolk ha i dei nedlagde skulebygga kringom i kommunen. Kanskje kan ein politikar vera med å rettleia på første samlinga i kvar bygd? Eller ein frå administrasjonen. Ein som kan språket!

PS: Eg har alltid oppfatta Ølvestveit som ein jordnær og stødig kar, og kan ikkje tenkja meg anna enn at dette var ein glipp. Ein veldig ein. For eg er nokså trygg på at «bygdene», altså folk flest, er fullt ut i stand til å gjera gode og fornuftige vurderingar, både i skulesaka og andre saker. I mange høve endåtil betre enn politikarane. Somme gonger mykje betre.

Svein A. Sunde