Ope brev til ordføraren om Dill

I lesarbrev i Grenda 8. juli og i Kvinnheringen dagen etter stilte eg deg nokre konkrete spørsmål om Dill-saka. Bakgrunnen for spørsmåla var skuffelsen, kanskje òg overraskinga mange kvinnheringar kjende på etter at ordføraren på eiga hand sette foten ned for kommunal hjelp til vidare drift. Eg trekte spesielt fram den store dugnadsinnsatsen som skjer rundt alders- og sjukeheimane i Kvinnherad, i dette tilfellet ved Halsnøytunet gjennom organisasjonen Optimisten. Men også ved Rosendalstunet, Husnestunet og ved Ølve alderspensjonat føregår det ein uvurderleg frivillig innsats, som har stor betydning i eldreomsorga. Også i høve til dei kommunale budsjetta. Mange meinte denne innsatsen fekk seg ein alvorleg knekk med ordføraren sitt nei til Dill.

Eg har sjeldan fått så mange tilbakemeldingar etter eit lesarbrev, som eg fekk i dagane etter at det stod på trykk i avisene. Dei fleste sat att med like stor undring, som den eg gav uttrykk for. Seinare er det mange som har venta på svar frå ordføraren, for både Dill-saka, og den friviljuge innsatsen i eldreomsorga opptek framleis mange innbyggjarar.

Det går mot val, ordførar, og vi vil gjerne vita kor du og Senterpartiet står i høve til dei spørsmåla som blei stilte i lesarbrevet i lokalavisene 8. og 9. juli. Vi lever enno i håpet om at du vil ta deg tid til å svara!

Kristian Hus