Om vegstandarden på Borgundøy – ynskjer oss asfalt

Ope brev til ordføraren i Kvinnherad.

Ærede ordførar! Eg sender denne e-mailen til deg for eg veit at du var på Borgundøy 17. mai, og at du då veit kor Borgundøy er. Noko eg mistenker enkelte i kommuneadministrasjonen ikkje har vore.

Som brukar av vegen på Borgundøy, er eg rett og slett både rysta og rista etter at siste laget med «grus» vart lagt nyleg. Dette er respektlaust og det med stor R! Trur det hadde vorte sterke reaksjonar andre stader også om dette hadde skjedd på meir sentrale strok, utan å nemna gatenamn.

At me òg kan tenka oss asfalt er sjølvsagt ikkje å leggja skjul på, men å måtta ta seg fram i ei «steinrøys» slik det er no, er faktisk trafikkfarleg, både for bilar, mopedar, og ikkje minst for dei som ynskjer å gå tur, og med barnevogn.

Det får vera nok at bilar har fått øydelagde dekk, så me håper du forstår alvoret i dette eg peikar på, og prioriterer ei utbetring snarast, før det skjer styggare hendingar.

Med helsing

Lars Hauge,Stord