Om sjølvskryt

Ein skal vera varsam med å leggja seg ut med Øyvind Hardeland (Ap) når han skriv om vegar og samferdsle, slik han gjer i eit lesarbrev i Grenda 12. august. For Øyvind veit kva han snakkar om, det skal han ha etter mange år langs vegane i Kvinnherad.

Ein sjølvskrytande statsminister er det eit bra teikn? Nei!

Men når han snakkar om politisk sjølvskryt, tykkjer eg han rettar litt bakar for smed. For det er mange politikarar som lir av det same, ikkje berre Erna Solberg, som han trekkjer fram spesielt i lesarbrevet sitt.

Statsministeren er i godt selskap, om ein kan seia det slik. Ikkje minst opposisjonspolitikarane, som tek mål av seg til å styra landet frå i haust, er flinke til å framheva seg sjølve og sine parti. Det er likt over heile fjøla, sjølvskryt og atter sjølvskryt. Nokon framstår endåtil som heilt suverene, og ser ut til å meina at dei veit betre enn alle andre – i alle saker.

Ein av dei sentrale på venstresida blir av og til nemnt som «norges mest arrogante politikar». Han er frå Bergen, må vita, og er ein god representant for sjølvskrytarane, til liks med mange andre. Desse nemner ikkje Øyvind Hardeland med eitt ord. Han tykkjer kanskje det er heilt greitt at folk på venstresida turar fram som dei gjer no i valkampen? Ein skal ikkje kasta stein når ein sit i glashus, er det noko som heiter. Det burde den gamle Ap-mannen tenkt på når han kritiserer statsministeren.

Det skal bli interessant å følgja med på vegbygginga i Kvinnherad og på Vestlandet generelt viss Jonas & co overtar makta i haust. Eg håpar verkeleg at vi får høyra litt meir sjølvskryt frå Ap og Sp når dei har fått styrt i nokre år.

Kristian Hus