Nye kraftlinjer er miljøkriminalitet

Alle som har eit liv på utsida av Statnett si boble forstår at den nye 420 kV-linja absolutt ikkje kan gå langs nokon av dei framlagde og melde traseane.

Med episenter i Rosendal har vi vassdragsvern, landskapsvern, nasjonalpark og KULA-status. På toppen av det heile tronar Baroniet Rosendal. Vi er i sentrum av det mest og best verna området i heile Noreg. Her finn du kvalitetar som har store nasjonale verdiar, der sikt-linjer er ein integrert del.

Einar Steensnæs, tidlegare statsråd i OED, skreiv då han avviste utviding av kraftverket i Hattebergdalen: «Det er viktig at turgåarar og andre brukarar av området får oppleva ei kjensle av at det ikkje vert gjort nye inngrep». Dette gjeld i høgste grad også nye kraftlinjer.

Alle Statnett sine framlagde alternativ er inngrep som er i konflikt med nasjonale vern. Det er eit stort samfunnsansvar kvinnheringane har gjennom å ta vare på nasjonale verdiar som betyr svært mykje både for folk og land. Å gjera inngrep som rører ved nasjonalskattane er ingenting anna enn miljøkriminalitet.

Dersom Statnett treng ei ny 420 kV-linje, så finst det alternativ som både kvinnheringar, verneobjekta og Statnett kan leva med. Kabel i fjord frå Husnes eller Omvikdalen til Årsnes eller lenger inn, må sjølvsagt utgreiast. Alternativet er kabel i tunell frå Omvikdalen til Årsnes.

Ikkje truverd

Når kabel er utgreidd og blir eit føretrekt alternativ, så er tida inne for å ta kampen om kvar resten av traseen skal gå, for dette er ei viktig sak for heile kommunen.

Statnett vil ha oss til å tru at kabel, som kvinnheringane ynskjer, er altfor vanskeleg og altfor dyrt. Det er ein påstand framsett heilt utan dokumentasjon, og har ikkje noko truverd på utsida av Statnett si boble.

PS! Politisk press er svært viktig, truleg det viktigaste. Vi må fylgja norsk forvalting sine vegar og no gje uttale til NVE om kva vi ynskjer og kva vi ikkje kan akseptera. Formelt vil ikkje saka møte politikk før ho kjem til Energidepartementet. Det er likevel kontakt mellom departement og direktorat, så til meir politiske signal og press vi kan utøva, til fortare kjem traseen på rett spor.

I Stortingsvalet hausten 2025 må det ikkje gjevast ei einaste røyst til parti som ikkje er heilt tydeleg på at linja skal i kabel.

Sigurd Vikøren