Ny veg over Varaldsøy – Via Utopia?

I Grenda den 01.11.2024 støttar Trygve Vikane framlegget til Frp-representanten Per A. Svindland i førre kommunestyremøte om å byggja ny veg frå søre enden av Varaldsøy (Låtrevik) og til Bondesundet, ny flytebru herifrå over sundet til Nernes, og nytt ferjeleie i Låtrevik. Føremålet med prosjektet skal vera at ein sparar drift av ei ferje på strekninga Årsnes – Gjermundshamn.

I det siste hundreåret er det mange som har leika seg med samferdsleprosjekt som er lite seriøse, kalla Via Utopia. Ein ting er at privatpersonar kan ha moro av slik sysselsetjing, verre er det når stat og kommunar løyver store summar til profesjonelle firma for å teikna strekar på eit kart, utan å antyda kostnadar med gjennomføring.

Høghastigheitstog Oslo – Bergen er vel det verste eg kjem på. Sunnfast med mellom anna tunell Sunde – Rullestad og privatforslaget om 30 km tunell Jøsendal – Enes kjem vel òg under kategorien luftslott.

Det kunne vore interessant å få kostnadsoverslag over prosjektet til Svindland. Vedlagt følgjer skisseforslag til trasé og kalkulasjonsgrunnlag. Kanskje dette kunne bli årets julenøtt i Grenda? Både hvermannsen og eksperten må få delta. Den som tippar ein totalkostnad som ligg nærast middelverdien av innkomne forslag, bør bli løna med heider og ære.

Kalkulasjonsgrunnlag for vegprosjekt Låtrevik – Mundheim

* Ny 2-felts veg frå Låtrevik (søre enden av Varaldsøy) – til Oldervik (ved Bondesundet), 12 km (Inkl. 3 km tunellar gjennom Hesten og Dalåsen): ? mrd. kr.

* Bru over Bondesund, 1,1 km ( Hardangerbrua 1,3 km): ? mrd. kr.

* Ny 2-felts veg Nernes – Mundheim, 3 km: ? mrd. kr.

* Grunninnløysing, inkl. ekspropriasjonskostnader: ? mrd. kr.

* Nytt ferjeleie i Låtrevik (inkl. ekspro. av 7- 8 hytter): ? mrd. kr.

* Veglys, straumkablar og nettverkskablar: ? mrd. kr.

* Uføresett: ulukker, vêrhindringar, rettssaker etc: ? mrd. kr.

* Finansierings-, regulerings- og prosjekteringskostnadar: ? mrd. kr.

Totalkostnader med dagens prisnivå: ?? milliardar kroner.

Rosendal, 02.11.2024

Olav Birger Espeland