Ny idrettshall i Rosendal - ope brev til kommunen

Arbeidet med ny idrettshall i Rosendal kan ikkje venta lengre. Både idrettslag og skular har eit stort udekka behov for innandørs hallkapasitet. Kommunepolitikarane må i haustens budsjettbehandling setja av nødvendige budsjettmidlar til kjøp av grunn, og prosjektmidlar for oppstart av arbeidet med ny idrettshall. Vi kan ikkje godta at idrettshallen blir ein salderingspost i budsjettet og skuva ut i ei uviss framtid med dei konsekvensar det har for idrettstilbodet for dei mange born og unge som bur i den delen av kommunen.

Stort udekka behov

Rosendal Turnlag har i mange år etterlyst ny idrettshall i Rosendal. Behovet er stort og veldokumentert. Det einaste innandørs tilbodet i dag er ein innandørs fløy av Samfunnshuset som skal romma ei lang rekke aktivitetar både for idrettslaget og for skulane.

Rosendal Turnlag er det nest største idrettslaget i kommunen med om lag 450 medlemmer og mange grupper som treng veleigna innandørs treningslokale. Det same gjeld skulane. Ein ny idrettshall i Rosendal vil dekka eit stadig meir presserande behov både for Rosendal Turnlag, skulane i nærområdet og i heile ungdomsskulekrinsen frå Mauranger til Uskedalen, med eit folketal på om lag 3600. Mange born og unge frå heile dette området deltar òg i ei rekke aktivitetar i regi av Rosendal Turnlag.

Brukarundersøking

At behovet er stort, skriv òg kommunen sjølv i si brukarundersøking frå 2022 som konkluderer med at: «Ei samla vurdering tilseier at ein ny og større idrettshall i Rosendal er naudsynt for å oppretthalde gode og forsvarlege tilbod i undervisninga hjå skulane, og for at dei frivillige organisasjonane har eigna areal til å drive fysisk aktivitet innandørs i periodar av året.»

Kommunen peikar òg på at tilgjengeleg hallflate i Rosendal er låg samanlikna med andre stader i kommunen, og at det vil ha stor sosial verdi å få etablert ein hall!

Vi deler fullt ut kommunen sine vurderingar, og vil visa til den store innsats idrettslag, foreldre og frivillige legg ned, og som er av stor sosial betydning både for inkludering og integrering av born og unge. Vi (kommunen) skuldar å leggja til rette for denne viktige samfunnsinnsatsen.

Bakgrunn

Rosendal Turnlag hadde store forhåpningar då kommunestyret 27.10.22 vedtok «at det skal regulerast for å plassera ein fleirbrukshall langs og sør for bassenget i Rosendal» (ved ungdomsskulen). Takhøgda skal vera romsleg nok til å opna for fleksibel bruk av hallen. Areal til dette skal vera stort nok til å kunna planleggja for stor fleirbrukshall, samt kunna innehalda parkering og nødvendig anna infrastruktur med uteopphaldsareal. Idrettshallen kan vurderast bygd saman med eksisterande skulebygg».

Dette er status

Områderegulering for Rosendal vart lagt ut på høyring etter møte i Utvalet for Plan, teknikk og miljø (PTM) 10.september, der det i område sett av til idrettshall står følgjande: «I felt o_KBA2 kan det jf. 5.1.2 oppførast fleirbruks idrettshall på inntil 2 500 m2 med tilhøyrande infrastruktur, parkering og uteopphaldsareal. Det er også opna for offentleg eller privat tenesteyting. Idrettshallen kan vurderast bygd saman med eksisterande bygg på o_T2. Største gesimshøgd GH=12,0 m. Det kan likevel etablerast tekniske komponentar som t.d. takhatt og ventilasjon høgare enn maksimal gesimshøgd. Det kan gjerast spesialtilpassing til friidrett, men hallen bør opne for fleksibel bruk.»

Idrettslaget ønskjer å greia ut ein stor fleirbrukshall. Men vi meiner det er uheldig alt i områdeplanen å avgrensa arealet på hallen til 2 500 m2 før det er gjort naudsynt kartlegging av kva funksjonar hallen skal romma og kva krav som skal tilfredsstillast.

For å koma i gang med arbeidet med ny idrettshall er det eit stort behov og ønske om raskare prosess rundt erverv av grunn og tydeleg prioritering i budsjettet.

Turnlaget er i vekst, og jobbar for å stimulere til utvikling som bidrar til vidare vekst. Om ikkje behovet vert tydeleg prioritert, fryktar idrettslaget at tilbodet vert ytterlegare svekka, og lokalsamfunnet går glipp av viktig verdiskaping og prioritering av folkehelse.

Ønskjer dialog

For å koma vidare og løysa det stadig meir presserande behovet for hallplass i Rosendal, er Rosendal Turnlag difor innstilt på å gå i dialog med kommunen og kommunepolitikarane om storleiken på hallen basert på dei krav og spesifikasjonar som må tilfredsstillast for at idrettslag, skular og andre organisasjonar skal få eit fullgodt og framtidsretta tilbod. Eit godt tilbod fortener dei mange born og unge som til dagleg deltek i mange ulike aktivitetar i regi av idrettslag og skular, og dei mange foreldre og frivillige som legg ned ein stor innsats for å leggja til rette for dette.

Styret i Rosendal Turnlag