Ny fornybar er ikkje berre vindkraft!

Takk for innlegget ditt, Annemor, og for at du deler dine tankar om kraftutbygging i Kvinnherad. Eg vil gjerne få klargjera nokre viktige poeng.

Først og fremst vil eg understreka at Småkraftforeninga er ein interesseorganisasjon som fremjar småkraft. Me har ikkje som mål å motarbeida andre former for kraftutbygging, men me er heller ikkje ein pådrivar for slike prosjekt. Vårt fokus ligg på å sikra gode vilkår for småkraftnæringa.

Kvinnherad Energi/Vind AS?

Under kommunestyremøtet 31. oktober presenterte Kvinnherad Energi eit strategidokument som har fått mykje merksemd i lokalpressa. Eg merka meg at du, Annemor, ser ut til å synonymisera omgrepet «ny fornybar» med vindkraft. Dette er misvisande og urettferdig overfor vår næring. Eit raskt googlesøk viser at småkraft blir omtala som ein del av «ny fornybar» i fleire samanhengar, inkludert av Statnett, som skreiv: «Bakgrunnen for ny stasjon er å legge til rette for ny fornybar småkraft samt behov for bedret forsyningssikkerhet i regionalnettet.»

Nytt strategidokument: Vindkraft og Muradalen

Prisverdig av kommunen

Småkraftnæringa har gjennom åra gjort omfattande ressurskartleggingar for å vurdera potensialet for småkraft. Desse undersøkingane har vore verdifulle for å utvikla næringa og utnytta nye fornybare ressursar på ein god måte. Eg ser det derfor som prisverdig at kommunen, gjennom Kvinnherad Energi, ønskjer å kartleggja fornybarpotensialet – der småkraft naturleg høyrer heime.

For Kvinnherad er ny fornybar kraft ein viktig industri som gir mange arbeidsplassar. Om lag 50 personar arbeider i denne sektoren i kommunen, og dei gjer ein stor innsats kvar einaste dag for å ta sin del av samfunnsansvaret. Dette viser kor viktig fornybarnæringa er som distriktsnæring.

Det er også viktig å minna om at Hydro Husnes, ei hjørnesteinsverksemd i kommunen, er heilt avhengig av stabil og akseptabel kraftpris for å oppretthalda produksjonen.

Svar til Annemor Ekeland: - Det er ikkje føreslege vindkraftutbygging i Kvinnherad

Eit godt bidrag

Småkraftverka i kommunen, og i landet elles, klarar ikkje å dekka heile kraftbehovet åleine, men me kan gi eit godt bidrag. Det er no om lag 630 GWh med ny fornybar småkraft under utbygging – mykje meir enn alle andre næringar til saman. I tillegg ligg det inne konsesjonssøknadar på til saman 700 GWh hjå NVE.

Småkraftverka i Kvinnherad bidreg allereie med kraft tilsvarande forbruket til alle husstandane i Kvinnherad og Stord. Dette viser at me leverer store mengder ny fornybar energi til samfunnet. No ser me at kommunen ønskjer å kartleggja meir småkraftpotensial, og det er ei utvikling eg set stor pris på.

Eg er glad for at kommunen baserer sine vedtak på solide fakta. Det gir grunnlag for gode og veloverveide avgjerder.

Lars Emil Berge

Styreleiar i Småkraftforeninga