– Noregsferie er fint fordi det bur folk i heile landet

Me er godt inne i juli månad og mange har teke seg ein velfortent ferie. Nokon har reist til utlandet på tur, men dei fleste har vald å satse på Noregsferie. Heile 8 av 10 planlegg å feriera i Noreg viser ei undersøking gjennomført av TNS Gallup på vegner av NHO Reiseliv.

To år med korona viste oss at òg større og mindre turar i eige land er ei fin avkopling frå kvardagen. Men ferielandet Noreg har liten verdi dersom det ikkje bur folk i heile landet. Folk som driv campingplassar, restaurantar, hotell, butikkar, frisørsalongar, ja, lista er lang.

Grunnlaget for alle desse næringane i bygd og mindre byar i fjell, fjord, kyst og vidde, har sterke og trufaste røter i fiske, skog og jordbruksnæringane. Utan at nokon vil driva desse næringane, vil det ikkje vera levande lokalsamfunn i heile landet, og der det ikkje bur folk, vil ikkje turistnæringane utvikla seg. Ei turistnæring som viser fram det flotte naturlandskapet som me er så stolte av.

Lokalprodusert måltid

Senterpartiet har sett store mål for matproduksjon tilpassa det lokale arealgrunnlaget. I Hurdalsplattforma står det at me vil ha ei forpliktande og tidfesta plan for å tetta inntektsgapet mellom jordbruket og andre grupper. Samt utarbeida ein opptrappingsplan for trygg matproduksjon på norske ressursar.

Årets jordbruksoppgjer var spesielt, det var stor kostnadsauke som vart kompensert, men det var òg første gong sidan 2013 at det vart tetting av gap i høve til andre grupper. Dette er ikkje berre viktig for bonden, for landbrukets ringverknader går langt utover næringa sjølv. Me skal ha store ambisjonar på vegne av spreidd norsk matproduksjon, for det er sjølve livsnerven for mange av dei stadane turistar i dessa dagar ferierer.

Så til deg som har vald Noregsferie. Det at det bur folk i bygd og by, i fjell og fjord, gjer det triveleg å reisa rundt i heile Noreg. Så kjøp deg gjerne eit lokalprodusert måltid eller kos deg med ein is i det varierande sommarvêret i ferielandet Noreg.

Noregsferie er fint fordi det bur folk i heile landet, det bur folk i heile landet på grunn av sterke primærnæringar. Dei vil Senterpartiet styrka framover.

God tur!

Nils T. Bjørke

Stortingsrepresentant for Senterpartiet