Nils Magne Kloster til minne

Nils Magne Kloster døydde 23.oktober 2023. Laurdag 6.april ville han ha blitt 72 år. Han er djupt sakna.

Nils Magne vart fødd i Skien i 1952, men budde heile sitt liv på Halsnøy. Etter barne- og ungdomsskule på Halsnøy vart det yrkesskule i Norheimsund og deretter eitt år på avdeling for svakstraum ved Åkrehamn yrkesskule. Dette likte han godt og ville halda fram med utdanning innan elektrobransjen så det vart eit år hos Leirvik Radioforretning før verneplikta, der han vart korporal i Garden.

Ukueleg livsmot

Som utdanningsveg vidare valde han høgskulen på Gjøvik. Han ville bli elektroingeniør. Etter eitt år på høgskulen, medan han var på ferie heime på Halsnøy, vart han skada i ei bilulukke, og totalt lam i armar og bein berre 22 år gamal. Det vart fyrst 9 månader ved Haukeland sjukehus, så 6 veker ved Sunnaas og deretter 3,5 år på Stord sjukehus.

På Sunnaas vart det kort og brutalt fortalt at han hadde ein komplett nakkeskade og ville bli lam resten av livet. Han fekk ei klar melding om at han hadde to val; enten å gi opp og sannsynlegvis få eit kort liv, eller gjera det beste ut av det og ta vare på det livet han hadde. Han valde det siste. Med sitt ukuelege livsmot og innstilling om at alt er mogleg, kjempa han seg tilbake til eit aktivt liv. Og sanneleg stod han på og var aktiv på mange område.

I 1987 reiste han rundt på ungdomsskulane og vidaregåande i heile Hordaland og snakka om trafikkulykker i Trygg Trafikk sin kampanje «Ikke tøft å være død», men alt mange år tidlegare starta engasjementet hans i lags- og organisasjonslivet der han har hatt mange styre- og leiarverv; m.a. i Ungdommens Røde Kors, i Halsnøy Idrettslag, i Norges handikapforbund både på kommune- og fylkesnivå og i Halsnøy samfunnshus.

Kommunestyrerepresentant

I nær 10 år sat han i Rådet for funksjonshemma, også som leiar, og han var kommunestyrerepresentant for Senterpartiet i to periodar og hadde to periodar som vara. Utanom å delta i ulike kommunale nemnder var han medlem i Det Alminnelege Utvalet til Fylkesnemnda for sosiale saker i Hordaland og Sogn og Fjordane og frå 2006 og heilt fram til 12.12.2019 var han brukarrepresentant i ulike utval mellom Helse Fonna og Sunnhordlandskommunane.

08.03.2006 vart Nils Magne medlem av Lions Club Halsnøy der han straks vart sekretær, ei oppgåve han hadde like fram til sin død. Dette vart ein svært viktig sosial arena for Nils Magne, til gjensidig glede for han og klubben. Dei siste åra var han ein engasjert medlem i klubben si boknemnd som arbeidde med fartøyhistorie frå Halsnøy, Fjelberg og Valen.

Årsaka til at Nils Magne vart buande i fleire år på eit rom på Stord sjukehus var mangel på tilrettelagt tilbod i heimekommunen og dårlege hjelpemidlar. Det vart ei lite spennande tid med mykje rulling fram og tilbake i korridorane, men også denne tida utnytta han godt.

Eigen bustad

Han tok eit kurs og blei radioamatør med kallesignal LA2MU. Den interessa dyrka han heile livet, og han vart ein kjend og aktiv brukar på alle band. Han var ei tid styreleiar i Sunnhordlandsgruppa av Norsk Radio Relæ Liga og var ivrig med i planlegging, bygging og vedlikehald av repeaterane på Kattnakken.

I desember 1978 flytta han inn på Halsnøytunet, som var nybygd på den tida, og fekk ei leilegheit på to rom med kjøkkenkrok og bad. Der vart han buande i 17 år.

I 1995 flytta han inn i eigen bustad i Heiavegen 82 A og no fekk han personlege assistentar. Han fekk frie hender til å planlegge og skapte seg ein praktisk og personleg heim, inne og ute. Han fekk ein heilt ny fridom og ved hjelp av timeressursen til brukarstyrte personlege assistentar fekk han eit mykje meir aktivt sosialt liv.

Frå no av vart universell utforming og brukarstyrte personlege assistentar som prinsipp for handikapa, to store hjartesaker for Nils Magne. Han vart eit stjerneeksempel på kva for ressursar som kan utløysast når ting blir tilrettelagt og han vart eit eksempel for oss alle.

Nils Magne hadde ein direkte og ærleg måte å vera på med mykje humor og han fekk mange vener og stadig nye vener. Han likte svært godt å reisa og gjorde mange turar både i Noreg og i utlandet, saman med vener og saman med assistentane sine, noko han var veldig takknemleg for.

Dyktig fotograf

I sum fekk han mange gode aktive år og han elska å invitera vener heim til seg, om vinteren på karakveld med god mat, noko godt i glaset og god varme frå vedaomnen, om sommaren i hagekroken med fyr på utepeisen og god mat frå grillen. Elles var døra open heile året. Me var alltid velkomne inn til ein god samtale og følte oss rikare då me gjekk derifrå.

Nils Magne var eit sjeldan klokt og inspirerande menneske. Han var ein teknisk begavelse med sterk biletleg hukommelse og forestillingsevne. Det gjorde han til ein fantastisk historieforteljar og det gjorde han til ein svært dyktig fotograf. Han tenkte ut mange sinnrike løysingar som kunne gjera livet enklare og omgjevnadane finare.

Vener kunne berre utføra det han bad oss om – resultatet vart alltid bra. Innretninga som han festa kamera til stolen sin med, er eit godt eksempel. Han etterlet seg svært mange flotte bilete.

Me takkar for venskap og alt Nils Magne gav oss personleg og heile lokalsamfunnet på Halsnøy og i Kvinnherad.

Takk skal du ha

Takk for den tio så va

Alt det du gjorde og sa

Før du reiste i fra

Alt det du va

Takk skal du ha

Et liv e slutt

Akkurat nå e forbi

Fortio kjeme på gli

Nå skal me minnast ein mann og ei tid

Me lyser fred over Nils Magne Kloster sitt minne!

Vener