Nei til monstermaster!

Som dei aller fleste har fått med seg, held Statnett for tida på med planlegging av ny trasé for transmisjonsnettet og ny 420kV kraftline gjennom Kvinnherad kommune. Dette er planar som har gitt meg mang ei søvnlaus natt. Korleis skal vi retta opp i feila frå 60-talet? Korleis skal vi spare bygdene våre? Korleis skal vi unngå monstermaster i Baroniet, nasjonalparken og kulturlandskapet vårt?

Dagens forslag

Heldigvis har ikkje dei søvnlause nettene vore bortkasta, og eg ønskjer derfor å lansera det eg trur er løysinga på problemet. Men først, lat oss gå gjennom forslaga som i dag ligg på bordet og svakheiter med desse:

* Parallelt med dagens trasé (Statnett):

Forslaget vil i beste fall gje liknande problem som i dag, men med 5-10 meter høgare master (og om det blir som i Hardanger, raude og kvite master som stikk seg ut i terrenget). Under byggetida vil ein dessutan ha TO parallelle kraftliner gjennom bygdene våre.

* Sjøkabel frå Mauranger til Matre, via Husnes (INP):

Diverre som mykje anna av INP sin politikk, lite gjennomførbart. Ikkje misforstå meg. Forslaget hadde sjølvsagt vore ideelt i ei draumeverd. Men med ein estimert kostnad på mellom 3-6 milliardar kroner (80-90 km sjøkabel) mot 570 millionar (57km luftspenn) for Statnett sitt forslag for same trasé, er det rett og slett urealistisk, og er allereie avfeia av Statnett.

* Leif Sverre Enes (Høgre) sitt forslag med trasé frå Ænes eller Svoldal, forbi Nonshaug og over Myrdalsvatnet, heim Melsdalen til Kletta – men eit stykke oppe i lia over busetnaden, inn Hattebergsdalen, opp til Skeisfjell og vidare til Matre:

Eg har stor respekt for varaordføraren, og veit at han har lagt mykje tid i å finna gode løysingar for kraftlina. Dessverre må eg likevel innrømma at eg tykkjer dette forslaget om mogleg er verre enn dagens trasé. Ikkje berre vil kraftlinene øydeleggje mykje av det magiske, urørte landskapet i Myrdal, det vil dessutan vera til sterk forringing av Hattebergdalens landskapsvernområde.

Til biletet:

Svart line: Dagens trasé (Statnett).

Raud line: Sjøkabel Mauranger til Matre via Husnes (INP).

Rosa line: Leif Sverre Enes (Høgre) sitt forslag.

Blå line: Per Harald H. Löfgren Johansen (Ap) sitt forslag.

* Eg tek atterhald om at detaljtrasé for forslaga kan vera noko annleis.

Nytt forslag

Statnett har vore tydelege på at dei forheld seg til stortingsmelding 14 frå 2011-2012. Der vert det slått fast at alt nett for 420kV skal byggast som luftleidning. Anten ein likar det eller ei, er det realiteten at det også er denne stortingsmeldinga som ligg til grunn for NVE si tildeling av konsesjon til Statnett for bygging av kraftlinene. Imidlertid gjev stortingsmeldinga også følgjande unntakstilfelle for luftleidning, med moglegheit for jord- eller sjøkabel:

«Dersom ekstrakostnaden for kabling av en begrenset delstrekning kan forsvares med at det gir særlige miljøgevinster sammenlignet med luftledning og/eller en begrenset delstrekning kan gi en vesentleg bedre totaløsing alle omsyn tatt i betrakning.»

Eg ønskjer derfor å nytte denne opninga til å foreslå følgjande trasé:

Det blir lagt sjøkabel på strekninga «Ruglebarm» til «Grytevika». Totalt ca 9,5-10 km sjøkabel. Luftline blir så lagt på vestsida av Omvikdalen til dagens linjetrasé i Myklebustdalen (5-6 km).

Til biletet:

Svart line er dagens trasé.

Blå line er alternativ detaljtrasé.

Raud line er dette forslaget.

* Eg tek forbehald om at detaljtrasé for forslaga kan vera noko annleis.

Fordelar/konsekvensar ved linjeforslaget:

* Går ikkje gjennom Baroniet, heller ikkje i umiddelbar nærleik.

* Går ikkje gjennom nasjonalparkane i fjellet (Folgefonna nasjonalpark og Hattebergdalens landskapsvernområde).

* Går ikkje gjennom kulturlandskapet i Rosendal.

* Går ikkje gjennom sentrale deler av bygdene Løfallstrand, Rosendal, Seimsfoss, Guddal eller Dimmelsvik.

* Når gammal kraftline er riven, vil store areal bli frigjort på strekninga Ruglebarm til Omvikdalen.

- Frigjort bandlagt byggeforbodsbelte, ved 40 m bredde, grunna elektromagnetisk stråling over 0,4µT feltstyrke er totalt over 400 mål. Derav fleire område med mogleg byggeland.

- Samtidig er det også vanleg å rekne eit belte på 100 m som er berørt av linene og helst ikkje skal nyttast til mellom anna bustadbygging. Dette arealet er på over 1.000 mål.

* Sjøkablar vil ha store samfunnsøkonomiske fordelar knytt til turismeinntekter, kontra diverse luftspenn, som vil forringe områda. (Eksempelvis dei store raude og kvite mastene i Hardanger).

* Djupna og traseen for sjøkabelen bør vera uproblematisk. Føreslegen trasé er ikkje djupare enn 200 m og held seg i stor del på stabil havbotn, utan særlege skar og rifter.

* Enkelt kostnadsoverslag:

- Ved 3 sjøkablar: 10 km sjøkabel + 5,5 km luftspenn: 350 + 55 = 405 mill.kr.

- Ved luftspenn: 16 km luftspenn: 160 mill.kr.

- Differanse 245 mill.kr.

- Total kostnadsramme på prosjektet er sett til ca 15 mrd. kr. Det betyr at denne kostnadsauken vil vera på mindre enn 2% av prosjektets totalkostnad. Noko som bør vera gjennomførbart.

Same kampen til Husnes

Forslaget er sjølvsagt innsendt til Statnett for vidare handsaming. Inntil endeleg trasé blir bestemt, vil eg oppfordre dykk alle til å engasjera dykk i saka! Husk at traseen Statnett bestemmer, vil bestå dei neste 60-70 åra. I denne omgang er det kraftline i indre delar av kommunen det gjeld, om berre nokre år vil den same kampen kome til Husnes og dei ytre delane av kommunen. Lat oss derfor stå samla i begge kampane.

Vi i Kvinnherad Arbeidarparti vil ikkje tillata monstermaster gjennom Baroniet og sentrale delar av bygdene våre! Vi i Kvinnherad Arbeidarparti vil kjempa for ein realistisk sjøkabel. Kjemp med oss!

Per Harald H. Löfgren Johansen

Kvinnherad Arbeidarparti