Nei, økonomien er ikkje så dårleg som det AP-representanten vil ha det til

I eit lesarbrev frå Per Harald Havnen Johansen (AP) skildrar han økonomien til Kvinnherad kommune som svært dramatisk. Han snakkar om flaks eller ROBEK. Dette er ei skildring Kvinnherad Høgre ikkje kjenner seg att i.

Ap-representanten sin medisin på utfordringane, er gjeninnføring av eigedomsskatt på næring. I Høgre er me svært overraska over denne uttalen og kan ikkje forstå at Kvinnherad Arbeidarparti kan stå inne for dette.

For Kvinnherad Høgre er det totalt uaktuelt å innføra eigedomskatt for næringslivet på noverande tidspunkt. Etter korona, høge straumprisar og auka arbeidsgivaravgift, har næringslivet vårt nok av utfordringar som det er, til at ein i tillegg skal gjeninnføra eigedomsskatt. I Høgre er me på lag med jobbskaparane, og vil stimulera til vekst i vårt flotte næringsliv.

Det kan òg verke som om Löfgren Johansen har vore litt for kreativ med tal. Her hadde vi forventa meir presisjon.

Me kan starta med lånegjelda. Totalgjelda for kommunen er 1 812 millionar kroner. Når du samanliknar med 2011, så må du òg ha med i reknestykket ditt at pengeverdien er redusert med om lag 30% på desse 12 åra. For øvrig har ikkje gjelda auka i det heile dei siste to åra.

Men: Den renteberande gjelda er 1 150 millionar. Det er denne gjelda som vi skal svara renter for. Då vert ikkje netto rentebelastning 90-100 millionar kroner, men i storleiken 50-60 millionar kroner. Mykje pengar det òg, men fullstendig handterbart.

Dessutan må me hugse på at me har eit disposisjonsfond på godt over 250 millionar kroner, som buffer mot eventuelt dårlege tider.

Löfgren Johansen er òg kritisk til nokre av kommunen sine investeringar. Likevel gjer han ikkje reie for kva konkrete investeringar dei siste åra han meiner skulle ha vore ugjort.

Vidare vert det nesten paradoksalt idet han tek til orde for å investera i nytt helsehus på Husnes, oppgradering av Husnestunet, Halsnøytunet, ny skule på Valen, ny idrettshall i Rosendal og oppgradering av kommunale bygg på Ølve og i Åkra. Om økonomien verkeleg er så dårleg – kor skal pengane til desse investeringane kome frå?

Det er verken flaks eller ROBEK vi styrer etter i Kvinnherad, men godt politisk handverk.

Til slutt vil òg Kvinnherad Høgre oppfordre kvinnheringane til å stemme på parti og personar til kommunestyret som har fokus på trygg økonomisk styring, og som ikkje tek til orde for auka skattar for næringslivet så fort ein reknar feil.

Godt val!

Vegard Bjørnevik

ordførarkandidat for Kvinnherad Høgre

Knut Johannes Helvik

2. kandidat for Kvinnherad Høgre