Motlaus? Saman kan vi gjere ein skilnad!

Det er lett å verte motlaus i ei verd med krigar, katastrofar og klimaendringar. Konfirmantane våre er i desse dagar med å løfte fram heilt konkrete løysingar. Desse gir mat, vatn og økonomisk tryggleik til menneske som treng det – og du kan bidra.

Kvar einaste dag ser vil bilete og overskrifter som minner oss på ei uroleg verd: Krigane i Midtausten pregar dei daglege nyhenda. Ukraina-krigen har gjort det same no i tre år. Langt mindre merksemd får krigar andre stader i verda. Dei er der likefullt, og den største humanitære krisa i verda er faktisk Sudan. Samstundes kjem meldingane om ekstremvêr stadig oftare.

Kva kjensler vekkjer desse inntrykka i deg? Sinne, fortviling? Eller kanskje maktesløyse?

Det er lett å kjenne seg handlingslamma i ei slik verd. Difor er det godt å vite at vi faktisk kan gjere noko her frå Noreg. Vi har nemleg klare døme på korleis heilt konkrete løysingar på bakken mange stader i verda kan redde liv. Ikkje berre som naudhjelp der og då, men som langsiktige endringar som hjelper menneske ut av fattigdom. Vi har sett håp i ein drope vatn – bokstavleg tala.

Konfirmantane mobiliserer

I desse dagar vert Kirkens Nødhjelp sin årlege innsamlingsaksjon sparka i gang: Fasteaksjonen.

Den har sitt namn etter fastetida, som er ein del av kyrkjeåret. Over 40.000 konfirmantar og frivillige skal samle inn pengar til den livsviktige hjelpa organisasjonen gir. Temaet er nettopp vatn – korleis tilgang til vatn både reddar liv og endrar liv.

I Zambia har folket gjennom eit heilt år opplevd den verste tørka på fleire tiår. Tørka har råka store delar av det sørlege Afrika, og millionar av menneske blei truga av svolt. Sjølv om avlingane har kollapsa i enorme område, finst det unnatak.

Klimasmart

Dei som har delteke i Kirkens Nødhjelps opplæring i klimasmart landbruk, har klart å dyrke mat gjennom tørka. Dei har fått tilgang til vatn og byrja å dyrke grønsaker med såkalla dryppvatning, der vatn blir pumpa opp frå grunnen og frakta i vasslangar ut til plantane. Gjennom små dropar får plantane nok vatn. Deltakarane sikrar seg mat, og i tillegg inntekter gjennom sal av grønsaker.

Saman med lokale krefter og partnarar sørger Kirkens Nødhjelp for løysingar som lokalbefolkninga sjølve er ein viktig pådrivar for. Ikkje berre i Zambia, men i alle land der Kirkens Nødhjelp jobbar med konsekvensane av klimaendringane. På den måten vert lokalsamfunn styrka slik at dei er betre rusta, unngår svolt og skapar seg inntekter.

Kirkens Nødhjelp er òg til stades i Sudan, Ukraina, Gaza og fleire andre store humanitære kriser. Vatn, mat, telt, teppe og hygieneartiklar er delte ut til menneske i naud, mellom anna takka vere Kirkens Nødhjelps fasteaksjon. Vatn er sentralt i veldig mykje av arbeidet. Reint vatn reddar liv!

Dersom maktesløysa tar overhand, er det verdt å minne oss sjølve på at kvar og ein av oss kan bidra – vi kan gjere ein skilnad.

Biskop Ragnhild Jepsen