Me ynskjer ikkje storbarnehage! Me ynskjer ikkje storskule!

Å endre offentleg skule kan vere så enkelt som å skape mindre skular. Dei mindre skulane kan vere medisin for det som er galt med offentleg skule. Mindre skular kan gjere opp for det negative i å leve i fattigdom, dei kan redusere vald, og dei aukar foreldreinvolvering. I dei mindre skulane får elevane betre resultat og dei har eit betre forhold til lærarane sine, enn i dei store skulane.

I alle fall om me skal tru ein større studie frå Chicago, Georgia og California. Du kan lesa om den viss du vil - Small Schools; Great Strides.

Me vil tru det same gjeld barnehagar.

Nabokommunane våre i Hardanger har lenge arbeida med tilflytting til kommunane. Flytt til Hardanger! lokkar med det gode liv, fri frå trafikkstøy, køar, tidspress og karrierejag. Dei lokkar med barnehagar og grunnskular som “(...) er relativt små med godt og trygt læringsmiljø. (...)”, og borna kan “(...) trygt gå eller sykla til skulen og ulike fritidsaktivitetar. (...)”.

Me finn det underleg at administrasjonen i Kvinnherad kommune vil gå i motsett retning, og skapa barnehagar og barneskular i kategori med dei største i landet. Dette trass elevundersøkingar, foreldreundersøkingar og nasjonale prøvar viser – i tråd med studien frå USA – at det er nettopp den mindre skulen som får best resultat. Kvinnherad kommune gjer det jo eigentleg, med dagens struktur, ganske godt i målbare undersøkingar og prøvar.

Ta nasjonale prøvar for 5. trinn, til dømes: Me er betre enn eller like gode som Voss og Lindesnes i engelsk. Me er betre enn eller like gode som Voss og Stord i lesing. Og i rekning er me betre enn eller like gode som Voss, Lindesnes og Stord - kommunar me måler oss mot over tid der altså.

Nettoinnflyttinga i desse tre kommunane var i 2020 på 60 personar. I Kvinnherad minus 23. Mogleg desse har flytta til Kvam, Ulvik, Eidfjord og Ullensvang i same periode? Har Kvinnherad vore så opptekne av alle dei som ikkje vil bu her, at dei gløymer å ta vare på dei som vil?

I bygdene me representerer bur majoriteten av kvinnheringane. Det er i bygdene me representerer, dei nye bustadfelta vert oppretta. Det er i bygdene me representerer at tradisjonar er sterke og identitetskjensla tilknytt nettopp bygda du kjem frå, er sterk. Hit flyttar småbarnsfamilien. Hit flyttar dei unge og single som skal inn på bustadmarknaden for fyrste gong. Hit flyttar føresette med skuleborn.

I bygdene me representerer bur majoriteten av arbeidstakarane i Kvinnherad. I bygdene våre bur den høge andelen unge uføre. Her bur majoriteten av born og unge. Det var hit folk flytta til då folketalet i Kvinnherad auka frå 13 025 i 2007 til 13 329 i 2012, og det er hit dei kjem til å flytta til når det i løpet av dei neste åra står klare nye bustader, nye felt og fråflytta einebustader etter seniorane som flyttar til Husnes.

Og då skal me òg ha skule og barnehage. Slik dei gjer det i Hardanger. Eller i Chicago. Eller på Voss.

Dersom det ikkje er tydeleg nok: Me vil behalda barnehagen vår. Me vil behalda skulen vår. Me ynskjer ikkje storskule! Me ynskjer ikkje storbarnehage!

FAU Bringedalsbygda barnehage

FAU Bringedalsbygda skule

FAU Halsnøy skule

FAU Omvikdalen barnehage

FAU Omvikdalen skule

FAU Sunde barnehage

FAU Sunde skule

FAU Undarheim barnehage

FAU Uskedalen skule

FAU Øyatun