Me er ikkje i mål

På denne tida for 50 år sidan fjerna Noreg forbodet mot mannleg homofili. Det var 85 år etter at Bernhard Getz (tidlegare ordførar i Kristiania, Høgre) som første i Noreg føreslo å oppheva forbodet i 1887. Noreg har gått sjumilssteg på desse 50 åra, likevel er me ikkje i mål. Me kjem aldri i mål. For det samfunnet som er ferdig utvikla, er ikkje utvikla, men ferdig.

Grunnleggande for vår politikk er respekten for individet og individet sin rett til å vera seg sjølv og gjere sine eigne val. Men fordommar, diskriminering og hat er som eit merus; me greier å slå det tilbake, så blomar uvesenet opp att i ei litt ny form, eller på ein ny stad. Så må me i gang att for å slå det tilbake. Difor er det naudsynt å heile tida forsvare vårt mangfaldige samfunn, og å stå opp mot dei som ikkje respekterer retten til å vere seg sjølv.

Høgre slår seg difor ikkje til ro med det som er gjort. Det er avgjerande å forsterka arbeidet mot hatkriminalitet. Me må få på plass ein nasjonal handlingsplan, og alle politidistrikt må sikrast kompetanse på dette området. Arbeidet for likestilling og alternative livsval i minioritetsmiljø kan berre skje der folk bur og lever, og difor må arbeidet mot negativ sosial kontroll intensiverast, kanskje spesielt på kommunalt nivå. I Høgre er vi også tydelege på at det som kanskje er den verste forma for negativ sosial kontroll, konverteringsterapi, må verta forbode.

Me veit mange unge melder om psykisk uhelse, og at unge skeive i mange tilfelle slit ekstra. Difor vil Høgre styrke både skulehelse- og psykologtenestene i kommunane. Samstundes må me setja born og unge i stand til å verta kjend med eigen kropp. Då må me ta inn seksualitet og grensesetjing allereie i barnehagen og styrkja seksualitetsundervisninga i skulen. Det må òg omfatte reproduktiv helse, kjønnsmangfald, LHBT+, og det må gjerast i alle skular.

Alle familiar bør vedkjennast som dei reelle familiane dei eigentleg er. Det er gammaldags å tenkja seg at ein familie er ein ‘one size fits all’. Difor har Høgre sagt at me må sikre ulike familiar like rettar.

Verda er meir enn Noreg. Høgre sitt fokus på kvinner og seksuell og reproduktiv helse internasjonalt har gjeve resultat. Me ynskjer same løft for LHBT+-personar, og er tydelege på at Noreg må ta internasjonalt leiarskap for å avkriminalisera homofili globalt.

Me har også eit særleg ansvar for å sikre dei som er på dobbel flukt, dei som flyktar både frå krig og fordommar som gjer at dei aldri kan reise tilbake sjølv når krigen er over. Difor prioriterer me LHBT+-flyktningar når me tek imot kvoteflyktningar. Me er ikkje i mål på verken kommunalt, fylkeskommunalt, nasjonalt eller globalt nivå. Difor er det viktig at vi feirer og markerer kjærleiken også i Kvinnherad.

Vegard Bjørnevik, leiar i Kvinnherad Høgre

Helge Ytterøy L'orange, leiar i Åpne Høgre