Markerte verdas miljødag 2021 med bievenlege buskar

Ho sette seg i batteribilen sin, og køyrte på kryss og tvers i kommunen, ho overraska resten av styret i lokallaget med bievenleg salvie og storkenebbstaudar. Verdas miljøverndag er ein FN-dag som har blitt markert i heile verda den 5. juni kvart år sidan den blei innstifta etter FNs miljøvernkonferanse i Stockholm 1972.

Tema for årets miljødag er kampanjen «Restore our Earth» med fokus på restaurering og å byggja opp igjen, planta tre, byggja grøne byar, rydja elvar og hav og endra matforbruk.

Landsmøte i Senterpartiet

Årets miljødag fall på same dato som Senterpartiet heldt sitt (digitale) landsmøte. Det har naturlig nok vore stort fokus på landsmøtesaker, men lokallagsleiaren i Kvinnherad lytta til sendinga på mobilen undervegs.

På vegne av lokallaget sette ho seg stemne for å møta styremedlemane i lokalpartiet, og planta ein bievenleg busk hos kvar av dei.

Turen starta hjå «Brødskreppo» i Omvikedalen der kasseraren og studieleiaren, Lene Vangberg Monsen var med å planta sin busk. Lene driv til dagleg med sine miljøvenlege og kortreiste produkt og fann at storkenebb passa godt i hennas hage.

Så bar det vidare «over fjellet» til Åkra, der nestleiar Andreas Ølvestveit bur. Her vart det planta ein storkenebb med hjelp av mor til Andreas, då han ikkje var heime.

På Halsnøy, hos styremedlem Jonny Lygre, trefte ho berre kona heime. Men gleda og merksemda på miljøsaka merkast.

På Husnes bur mannen med dei mange etternamna, Geir Tyssedalstveit Dolonen-Marthinussen, han er ein særs miljøengasjert styremedlem og lovde å taka godt vare på både biene og busken dei skal halda seg med.

Heima på Bondhus fekk nabo og styremedlem Kristian Bondhus Jensen sin blom og sanneleg fann leiaren plass til ei plante i sin eigen hage og.

Benthe Bondhus

Kvinnherad Senterparti