Kvinnherad = innovasjonsfri sone? – nei! Så langt i frå.

Dette er svar på Arne Gjerde sitt lesarbrev til lokale media 2.3.2022. Overskrifta peiker på at innlegget skal vise til manglande innovasjon i Kvinnherad kommune. Eg klarer ikkje å sjå direkte samanheng mellom påstand i overskrift og innhaldet i lesarbrevet.

Eg ynskjer ikkje å gå inn i Arne Gjerde si framstilling av arbeidet med Gullparken og dei tangeringane som han har hatt med Kvinnherad kommune i samband med dette. Dette er ein lang føljetong, og det er fleire sider som ein kunne ha fått fram i denne samanheng. Dette er derimot ikkje ei sak for media, men høyrer til i samspelet mellom utbyggjar/søkar/kunde og Kvinnherad kommunen som forvaltar/kundehandsamar.

Plan- og byggsaksbehandling skal ta i vare mange omsyn. Rettstryggleik, interesseavveging og andre trauste vurderingar må faktisk gjerast, men å sette dette som grunnlag for påstand om at det ikkje skjer innovasjon i Kvinnherad kommune vil eg ta sterkt avstand frå. Innovasjon ser ein innafor dei fleste felt innan kommunen si tenesteutvikling. Innan plan og byggesak er innovasjon særleg knytt til arbeidet med å digitalisere arbeidsmetodar og medverknadsprosessar. Her er det mål om å nytte kommunane sine ressursar ytterlegare – fleire planar og byggesaker for mindre pengar samt styrke dialog, kundeoppleving og samspel både med private aktørar og næringsaktørar.

Planarbeid etter plan og bygningsloven tar tid. Korleis ein skal gå fram i planarbeidet er fastlagt i lov og sedvane. Her er det mange omsyn å ta, og mange som har rett til å kome med innspel. Nokon offentlege partar kan òg kome med motsegn. At tolemotet kan bli hardt prøva for somme har vi forståing for. Men ein skal ikkje gløyma at omsynet bak reglane er å sikre allmentas interesser takast vare på i tillegg til det den so tek initiativet ynskjer.

Samstundes ynskjer politisk leiing, kommunedirektøren og alle tilsette i kommunen å støtte opp om dei kreftene som ynskjer å bidra til utvikling av samfunnet. Dette meiner eg at vi i mange høve får til, men samstundes er det nokon som opplev at dei møter motbør i sitt engasjement.

I lokale media høyrer vi oftast frå dei som ikkje er nøgd med utfall av ei sak – og diverre i mindre grad frå dei som er svært nøgd. Men vi veit at dei og er mange, og vi ser daglege bevis på at positive vedtak vert realisert i heile kommunen. Dette er nokolunde i tråd med erfaringar frå andre kommunar – vi har det same regelverket – men grad av vedtekne og relevante reguleringsplanar kan variere.

Samspel mellom politikk og administrasjon er òg tema som vart omtala i lesarbrevet. Styringa i alle kommunar er delt, vi har ei politisk leiing og ei administrativ leiing. Forholdet og samspelet mellom desse to rollene er mellom anna regulert i kommunelov, politisk reglement og delegeringsreglement. Det er kommunedirektøren si oppgåve å førebu og greie ut saker til politiske organ og iverksette politiske vedtak. Det er òg kommunedirektøren si oppgåve å forvalte lov, forskrift og avtaler i tråd med delegeringsreglement vedtatt av kommunestyret. Det er politikarane si oppgåve å gjere vedtak i saker som vert fremja for dei ulike politisk organa.

Samspelet må vere tufta på tillit og gjensidig respekt, og ein må vere særs merksam på det handlingsrommet som ligg i dei ulike rollane. Det er såleis klare grenser for korleis og i kva grad politisk og administrativ leiing kan bevege seg inn i kvarandre sitt handlingsrom. Dette er ikkje nødvendigvis openbart for innbyggjarane, men dette vert lagt til grunn når dei ulike rollane engasjerer seg i ulike saker.

Kvinnherad 9. mars 2022

Ragnhild Bjerkvik

Kommunedirektør