Kvinnherad Energi/Vind AS?

Spørsmål til ordførar Vegard Bjørnevik:

Som gamal vindkraftmotstandar og aktivist skal det mykje til for å vippa meg av pinnen – men det klarte nesten styreleiar i Kvinnherad Energi AS (KE) sist torsdag (ref. Grenda). Her står altså styreleiar Magne Heimvik i KE og lanserer for kommunestyret, som er generalforsamling (repr. ved ordførar), at selskapet hans opnar for å få bygd vindindustri i fjella våre.

Dette gjer han, trass i at kommunen har eit samrøystes, gjeldande vedtak om nei til vindkraft, og sterk folkeleg motstand. Sjølv om Heimvik bur på Stord, må den gamle Utåkerbuen ha fått dette med seg. Om ikkje anna burde dagleg leiar i KE og høgremannen Øyvind Lernes ha fortalt han dette. Han var med på nemnde vedtak, om eg ikkje minnest feil.

Det er no nett eitt år sidan det nye kommunestyret kom saman. Samtlege parti hadde nei til vindkraft i valprogramma sine, eller støtte til tidlegare vedtak. Ordførarkandidatane svara klart nei til vindkraft på LO sitt debattmøte på Kulturhuset Husnes 31.08.23. I intervju med Kvinnheringen, 08.09.23 svara dei same kandidatane bestemt nei til vindkraft. Det same gjorde dei på treff med oss i Aksjonsgruppa.

Klar melding

Alt dette er offentleg kjent, men kvar var dei torsdag 31. oktober? Til all lykke har me vakne politikarar som Ove Lemicka, Frp og Gunnar Helleland, INP. Dei gav klar melding til Heimvik om at i Kvinnherad skal me ikkje ha vindkraft, og om straks å leggje eventuelle planar om vindkraft vekk.

Eit aksjeselskap har i prinsippet stor fridom, også i eit kommunalt eigd som KE, me no kan ein lura på om det har føregått noko før framføringa på torsdag. To spørsmål tvingar seg fram;

1. Hadde styreleiaren i KE avklara dette avsnittet med ordførar/varaordførar?

2. Når vil ordføraren - som generalforsamling, og i samsvar med gjeldande vedtak, syta for at dette avsnittet vert teken ut av Strategiplanen til KE?

Annemor Ekeland

Nei til vindkraft i Kvinnherad