Konsesjonskraft Kvinnherad kommune 2022

Konsesjonskraft er ein del av den produserte elektriske energien som eigarar av større vasskraftverk, i Kvinnherad SKL og Statkraft, må avgi, inntil 10%, etter vilkår i konsesjonen til låge («sjølvkost») prisar. I Kvinnherad er denne prisen i år 11,57 øre/kWh, som er fastsett av OED. I tillegg kjem kostnader på vel 1 øre/kWh for å få levera straumen inn på linenettet (sentralnettet).Samla kostnad for innlevert konsesjonskrafta for Kvinnherad er såleis om lag 14 øre/kWh.

Konsesjonskrafta er ein lovbestemt rett til uttak av kraft for utbyggingskommunane, og er ein «kompensasjon» for å nytta lokale naturressursar.

Vedlagd er eit oversyn over inntekter kommunen ville hatt ved å levera heile konsesjonskrafta i spot i 2022.

Konsesjonskraft volum er 160,485 GWh (millionar kWh).

Eigeforbruk til kommunen 16 GWh som kunne vore levert til 14 øre/kWh, og ikkje som i dag til om lag 30 øre/kWh. Differansen kjem fram som inntekter i sal av konsesjonskraft, men burde i staden vore redusert i kommunebudsjettet.

I tabellen min er brukt den faktiske spotprisen i år fram til august 29. og vidare eit forsiktig overslag på 370 øre/kWh for september og oktober og vidare 390 øre/kWh for november og desember.

Som ein ser er inntektspotensiale ved å levera heile konsesjonskrafta i spot på om lag 397 millionar. for inneverande år og ved å nytta konsesjonskrafta til kommunen sjølv til eige bruk om lag 355 millionar. Her er kostnaden for konsesjonskrafta pluss innlevering trekt frå.

Tala ovanfor står i stor kontrast til det som var opplyst i Grenda 28.08.22, der kommunedirektøren opplyste at estimert inntekt for 2022 var 87 millionar kroner og 109 mill. for 2023.

Straumprisane vil truleg også auka dei næraste åra. Det vil vera utopi å tru noko anna, særleg når ein veit det vil ta mellom 10 og 15 år å byggja slike kraftliner det her er tale om, for å utjamna prisane i Noreg.

Mitt råd til kommunestyret er «pensjoner» investeringsutvalet og gi kommunedirektør/økonomisjef fullmakt til å selja all konsesjonskraft i spot, med fråtrekk av eige forbruk. Det vil her vera behov for ein aktør til å formidla konsesjonskrafta i marknaden. Sidan konsesjonskrafta er føreseieleg for heile året, månad for månad, og ikkje avhengig av kraftproduksjonen eller nedbøren, vil ein årleg kostnad for ein aktør truleg vera kring 200 tusen.

Slik vil ein kunna gi straumstøtte til næringslivet og alle innbyggjarane som ikkje får straumstøtte. I tillegg hadde det vore kjærkome i desse tider å fjerna eigedomsskatt alt frå inneverande år, med unnatak av verk og bruk (SKL, Statkraft m fl.).

Terje M. Enes