Kommunen bør kjøpa tilbake Vikjo 7

«Loddet er (forlengst) kasta» og Eviny/BKK søker etter ny lokalitet til sine medarbeidarar. Underforstått skal eigedomen på Vikjo 7 seljast. I eit tidlegare innlegg om dette påpeika underteikna det faktum at kommuneleiinga (vidare berre kalla kommunen) ved salet av Kvinnherad Energi og eigedomen også selde eit offentleg tilfluktsrom.

I nyheitene kjem det no (dessverre) fram at det er behov for slike, og at ein kanskje skal gå tilbake til tidlegare byggereglar som gjaldt då Kvinnherad Kraftverk (som det då heitte) sitt/sine bygg vart oppførte. Vidare grensar eigedomen til kommunal kai, og ligg eit steinkast frå friområdet på Holmen.

Ta ansvar

No kan/bør/må kommunen både ta ansvar for den feil det i ettertid har vist seg å vera det å tapa lokal styring og kjennskap ved salet av (dåverande) Kvinnherad Energi, samt sjå sitt snitt til å både opprette krigsberedskap (ikkje noko hyggeleg ord, men slik er det berre), og samstundes bevare og vidareutvikle Vikjo ved å kjøpe tilbake eigedomen. I tillegg til beliggenheita som nemnt over, kjem gode lokale (som kommunen tidvis har nytta seg av).

Og som om ikkje det skulle vere nok, så er hovudbygget teikna av same arkitekt og såleis har lik utforming som sjølvaste rådhuset!

Vidare har drift og vedlikehald av veglys vorte kritisert etter at ansvaret for dette gjekk over til anbodsmetoden. Her kan kommunen ved (noverande) Kvinnherad Energi overta ansvar for dette og ha lokale på Vikjo, der er det tilrettelagte også for dette. Sikkert eit forslag som er vanskeleg å få til, men: Ein får ting til viss ein berre vil!

Dimmelsvik 10.01.25

Kjell-Magne Skjævesland