Gjeld Sunnfast og tilknyting til E39

Ope brev til kommunedirektøren i Kvinnherad Rosendalsvegen 10, 5470 Rosendal.

Syner til Sunnfast sine planar og forslag om å knyta Kvinnherad til kyststamvegen E39 med flytebru over Husnesfjorden, bru over Laukhammarsundet og bru over Skjeleviksundet.

Initiativet med å knyta kommunen til den nye kyststamvegen, som ser ut til å koma, er bra. Denne vegen vil vera svært positiv for heile kysten og kommunen vår.

Men som alltid er det snakk om pengar, og fylket sin reaksjon er ikkje til å misforstå. Som eg har teke til ordet for før, har prosjektet som Sunnfast står bak ein svært høg pris, og eg tolkar det slik at fylket meiner at prosjektet ikkje er realiserbart.

Prosjektet har også med seg fleire problemstillingar som er uavklarte, som:

• Det er lagt inn ei flytebru over Husnesfjorden som vil vera eit stengsel for trafikken på fjorden. Ein eller annan instans må godkjenna dette.

• Meininga er at dei største fartøya skal gå gjennom Laukhammarsundet der det er tenkt ei bru med 75 m fri høgde. Laukhammarsundet har fleire grunner slik at det måtakast høgde for ei vesentleg muddring/kostnad som ikkje er teke med i prisoverslaget. Egset også spørsmålsteikn med om store farty kan passera her fordi sundet rett og slett er for trongt for større fartøy.

• Sunnfast har frå tid til anna vore ute i pressa med kostnadsoverslag på 6-6,5 milliard. Dette er tal utan renter/finanskostnader som av Multiconsult er berekna til 1,9 milliard. I tillegg kjem kostnad med garanti for eventuell svikt i bompengeinntekter. Eg undra meg over kven som kan stilla denne garantien som vil bli kravd for å finansiera bompengelånet?

• Det er ikkje teke med kostnader til muddring i Laukhammarsundet.

• Totalt vil nok kostnadane i prosjektet passera 9milliardar, og kanskje 10. Når det i tillegg er klart at tilskot frå det offentlege har blitt redusert med 1,2 milliard set ein tilbake med eit finansieringsbehov på minimum 7 milliardar. Det er uklart kvar desse pengane skal koma frå.

• Sunnfast har avvist å sjå på alternativet med å leggja tilknytingsvegen over Halsnøy som er den delen av kommunen som ligg næraste Huglo. Her er det mogleg med undersjøisk tunnel som er ei betydeleg billigare løysing enn flytebru.

Ei løysing over Halsnøy med tunnel mellom Halsnøy og Huglo (via Hidle) ville i grove trekk ført til reduserte kostnader. Statens vegvesen har kalkulert første etappe på Rogfast-tunnelane med pris på standard undersjøisk tunell og dobbel køyrebane på 210.000 kr pr meter.

Ein tunell frå Halsnøy til Huglo vil bli ca. 6500 meter.

I 2010 fekk Stord kommune utarbeidd ein studie for å knyta Huglo til Tysnes med tanke på framtidig bru over Nuen. Av denne studien går det fram at ein tun ell frå Huglo til Hodnaneset blir om lag 3400 meter lang.

Samla sett vil desse to tunnelane (Halsøy Huglo og Huglo Tysnes) bli om lag 9900 meter. Kostnad på tunnelane og veg over Huglo vil då totalt koma på rundt ein tredjedel av kva Sunnfast si løysing vil bli.

I samtale med styreformann i Sunnfast kom det fram at deira opphavelege plan var å ta utgangspunkt i Halsnøytunnelen og gå med ny tunnel derifrå og til Huglo. Dette blei forkasta, blei det sagt, då ein møtte nokre djupe dalar. Undersøkingane kan ikkje ha vore grundig nok eller dei må ha vore på feil stad fordi det ikkje finst djupe dalar i traseen eg meiner bør veljast. Det ligg til rette for tunnel her. Den kan gå direkte frå Halsnøytunnelen, som vil vera ein lengre distanse, eller frå Klostervågen til Huglo via Hidle.

Mitt forslag til utvalet er at dette alternativet med tunnel blir vurdert då eg er redd flytebru over Husnesfjorden ikkje lar seg løysa, både på grunn av kostnad og det stengsle det vil bli av fjorden. Uttale frå fylkesrådmannen talar sitt tydelege språk.

Gerhard Eide