Ført bak lyset av Eviny?

I lokalavisa kunne me før jul sjå at BKK søkjer etter nye lokale for si verksemd i Kvinnherad.

Lokala dei disponerer i dag er eigd av morselskapet Eviny og for store, og då truleg for dyre. Dette står i kontrast til stoda og bodskapen då Eviny kjøpte opp nettselskapet til Kvinnherad Energi og administrasjonsbygget med lager og verkstad i 2019. Då var lokala for små for aktiviteten ein då såg for seg, og leigetakarar måtte sjå seg om etter nye lokale.

Lovnadane om ny verksemd og framhald av eksisterande var tydeleg i tilbod og avtale som vart førelagd Kvinnherad kommunestyre i samband med oppkjøpet. Kvinnherad skulle verta sete for eit av dei fire regionane i BKK si regionsorganisering av verksemda, og regionen skulle veksa derifrå.

Knapt fem år seinare ser ein tydeleg kva veg dette har gått. BKK sette ein strek over regionsorganiseringa etter knappe tre år. BKK vart då på nytt ein sentralstyrt organisasjon med ein sterk gravitasjon mot Bergen. Lokala ein etterspør i Kvinnherad no, er vel under ein fjerdedel av det ein i dag har tilgjengeleg i Dimmelsvik. Då seier det seg sjølv kva framtidsplanar BKK har for nettdrifta i og rundt Kvinnherad. Det er langt frå det som vart lova og avtala i samband med oppkjøpet.

Kommunen bør kjøpa tilbake Vikjo 7

Finna fram avtalen

Eg oppmodar igjen politikarane i Kvinnherad om å finna fram avtalen frå oppkjøpet, og stilla krav i høve til lovnadane som vart gitt der. Både skriftleg og munnleg i plenum i kommunestyret. Slik BKK er organisert no, vil det automatisk medføra ei sentralisering - sjølv om det ikkje er «vond vilje», vert det resultatet. Om ikkje ein gjer noko aktivt, slik som med «regionsorganiseringa» i 2020, vil diverre folk og ressursar gravitera mot sentraladministrasjonen i Bergen.

Dette er no vorte svært tydeleg i Kvinnherad, der arbeidsstyrken er nær halvert i høve til fusjonstidspunktet. Det har dei òg fått med seg i Sogn og Fjordane Energi, SFE, som var i samtalar med Eviny om fusjon i 2024. Desse samtalane vart avslutta før jul, og SFE valde å gå vidare åleine. Faren for ei rasering av arbeidsplassar lokalt var eit av argumenta. Ein veit kva ein har, men ikkje kva ein får, særleg med ein avtalepartnar som Eviny, som diverre i praksis viser seg å vere upåliteleg når det kjem til å fylgje inngåtte avtalar.

BKK: – Vil flytta for å styrka fagmiljøet

Heimlaust

I Kvinnherad ser det no ut til at ein flyttar verksemda ut av tenlege lokale som er bygd for formålet, for å realisere verdiar i bygningar og areal, og leige dyrt og dårleg ein annan stad. Dette har jo BKK/Eviny god trening i. BKK hadde ein perfekt stad å driva E-verk frå på Kokstad, der rådde dei over cirka 50 mål, og stor og tenleg bygningsmasse. Det var òg god tilkomst, som med ny E39 frå Os ville bli endå betre.

For cirka seks år sidan fekk ein det for seg at her måtte ein selje og flytte verksemda nærare Bergen sentrum. Med funksjonelt skilje mellom Eviny og nettselskapet BKK, så kunne jo morselskapet flytta og overlate tomta til nettselskapet. Men neidå, her skulle det seljast og nettselskapet skulle få seg ny industriell lokasjon i Kokstadområdet innan tre år.

Dei som kjøpte smilte heile vegen til banken, og har realisert deler av eigedomen til god gevinst, og leiger ut til eit heimlaust BKK som enno ikkje har fått noko ny industriell lokasjon, etter fem år. At dette er ei dårleg sak økonomisk er det liten tvil om, verre er det at morselskapet i staden for å leggje til rette for nettselskapet stikk kjeppar i hjulet for rasjonell og effektiv drift.

Bør kunne forventa

No tenkjer ein å gjere det same i Kvinnherad. Ein finn truleg ikkje betre stad å drive nettselskap for heile kommunen enn i Dimmelsvik. Om arealet for tida er for stort, så bør jo Eviny som eig bygget kunna leiga ut ein mindre del til BKK og finna andre leigetakarar for resten. Uansett er det for seint å snyta seg om nasa er vekke, dersom ein først sel og finn ei dårleg erstatning.

No ser det ut til at dei og tenkjer å gjere det same i Knarrvik, der har BKK gode fasilitetar etter tidlegare Nordhordland Kraftlag. Ein bør kunne forventa at Eviny som morselskap tek ansvar og legg til rette for nettselskapet BKK i dei krevjande åra som ligg føre, slik at dei får best mogeleg høve til å byggje og drive nett, og ikkje reke rundt omkring.

Lars Enes