Forslag til vegløysing for Kvinnherad

Eg er ein forhenverande innbyggjar av Kvinnherad kommune, men bur no i nabokommunen. Men eg held meg litt oppdatert kva som skjer i Kvinnherad. Den «varme poteta» for tida er fylkeskommunen sin økonomi, eller rettare mangel på sådan. For å bøta på økonomien vil fylkeskommunen ta bort ei ferje mellom Ranavik og Skjersholmane og ei ferje mellom Årsnes og Gjermundshamn. I tillegg skal busstransport verta monaleg dyrare, likeså dyrare å reisa med hurtigbåt.

Tenkjer tilbake på då ferja måtte ut av Leivik, den skulle mellombels gå til Skjersholmane då der var eit ferjeleie som ikkje var i bruk. Mellombels, så snart som, straks med meir, er tidsomgrep med ei byrjing, men ingen ende. Altså den mannen som uttalte at ferja skulle gå mellombels til Skjersholmane til nytt ferjeleie kom på plass - han har sine ord i behald om det endå går 100 år til.

Årsnes-Lotrevik

Registrerer òg at det i ytre luten over tid har vore stor iver og entusiasme for noko dei kallar Sunnfast, som då er ei flytebru frå Åskesholmen til Huglo. Eg har ofte grunna på kva dei vil på Huglo å gjera. Eg tenker det må til to bruer til, då er dei på Tysnes - og er framleis like langt. For eg tenker at ingen vil gå med på å stenga fjorden med nokon form for brukonstruksjonar, anten det er over- eller undervanns, ref. Forsvaret, Kystverket og større tungskipstrafikk.

Eg registrerer at i sist kommunestyremøte i Kvinnherad vart det frå Frp-representanten Per A. Svindland lagt fram eit forslag til ferjetrafikk i indre luten. Forslaget går ut på at ferja går til/frå Årsnes-Lotrevik på innsida i Skjelnesodden, der seglingstida er 8 minutt. Så lagast det nytt ferjestø i Lotrevik, ny veg fram til Bondesund på nordsida av Varaldsøy, derifrå flytebru over til Nærnes, ny veg mot Mundheim og opp Mundheimdalen til Holdhus og Eikelandsosen, ny vegtrasé til Hovdasund med bru over til nordsida av Samnangerfjorden (Askebogane), så veg videre og inn på den nye vegtraseen frå Os til Bergen.

Berre éi ferje

Med denne løysingen til Per A. Svindland vil det vera behov for berre éi ferje i sambandet i indre luten. Her burde òg regelverket for ferjeavløysingsmidlar vore noko justerte. Løysinga vil òg innebera at ferja Hatvik-Venjaneset er eit blad i historieboka, det burde vel herr Søviknes applaudera?

Og dersom nokon hadde tenkt at ein «køyrbar» veg frå Våge til Holdhus så kunne endå ei ferje blitt historisk. Altså ferja Våge-Halhjem er det ikkje lenger bruk for. Den løysinga burde vel ordføraren i både Bjørnafjorden og Tysnes applaudera.

No når det er snakk om å spara pengar, vil ein kunna investera i Per A. si løysing, og så kvitta seg med to ferjer og få ein arm til Bergen frå Kvinnherad, og samstundes òg frå E134. Men vi ser at denne løysinga vil berøra Kvinnherad, Ullensvang, Kvam, Bjørnafjorden og gjerne Tysnes og Samnanger òg. Her må det til eit spleiselag mellom dei involverte kommunane, der alle dei involverte kommunane dreg lasset saman same vegen!

Mvh ein utflytta kvinnhering

Trygve Vikane