Føredrag med lokal Midtausten-ekspert

Torsdag 16. januar er det på 'an igjen i Kvinnherad Senioruniversitet. Då vert det eit svært aktuelt og spanande møte i kinosalen i Kulturhuset Husnes. Gjesten vår, Dag H. Tuastad, er fødd og oppvaksen på Husnes. Han har teke doktorgrad på, og har spesialisert seg på, historie, kultur, samfunn og politikk i Midtausten. Han er ein av landets fremste Midtausten-kjennarar. NRK nyttar han ofte som kjelde når nokon skal kommentera utviklinga i konfliktane og krigane i denne svært urolege regionen.

Når han kjem til oss, så er overskrifta «Midtausten etter Gazakrigen». Han seier sjølv om kva me har i vente:

«Korleis var vegen fram til 7. oktober, både i Israel og Gaza? Og korleis har Gaza-krigen endra Israel, Gaza, og heile regionen?

I føredraget vil både israelsk og palestinsk side bli analysert og plassert i historisk og politisk kontekst. Kva er den såkalla «religiøse sionismen» som no står så sterkt i den israelske regjeringa? Korleis heng palestinarane sin mangel på demokrati samen med bruken av vald? Vidare vil regionale aspekt diskuterast. Kva Midtausten veks fram etter Gaza-krigen?».

Aldri fred?

Det er nokre av dei mest langvarige, umenneskelege og fastlåste konfliktane i verda Tuastad skal fortelja oss om. Me spør oss vel alle stundom: Skal det aldri bli fred i dette vepsebolet? Konfliktane er kompliserte og me løyser dei nok ikkje denne føremiddagen, men eg har tru på at me går derifrå meir opplyste og med meir kunnskap om kvifor det har gått så gale.

Etter føredraget vert det lett servering i Festsalen. Me minner om at møta i Senioruniversitetet er opne for alle som har tid og lyst på litt fagleg påfyll og ein god drøs på ein torsdag føremiddag.

Styret i KSU v/Steinar Haugan