Fjelbergstemnet 2. pinsedag

I vel 40 år har det vore misjonsstemne på Fjelberg i samarbeid med Misjonsalliansen. Alliansen vart grunnlagt i 1901, og driv diakonale misjons- og utviklingsprosjekt i Bolivia, Ecuador, Brasil, Liberia, Sierra Leone, Kambodsja, Filippinene, Vietnam og Kina. Misjonsalliansen sin fyrste utsending – Ludvig Eriksen, budde i prestegarden på Fjelberg nokre månadar på 1880-talet. Opphaldet her vart svært viktig. Eriksen fekk nye krefter og hjelp til å finna livsvegen vidare.

Det vert gudsteneste i Fjelberg kyrkje på føremiddagen. Etter gudstenesta helsar vi Verdiseglasen god tur vidare. Så vert det sal av middag og kaffi i prestegarden før ettermiddagsmøtet i kyrkja. Talar er Arnt Jerpstad, dagleg leiar i Alliance Microfinance.

Kvartetten «Ære» frå Kvinnherad syng både på gudstenesta og ettermiddagsmøtet. Gudstenesta vert leia av sokneprest Carsten Mrusek. Kantor er Eva Megyesi. Kystpilegrimsprest Einar Vegge og prost Svein Arne Theodorsen tek del.

Hjarteleg velkomne til Fjelbergstemnet!

Svein Arne Theodorsen, Prost i Sunnhordland