Fjelberg kyrkje 300 år

Førstkomande søndag er det duka for jubileumsfeiring for Fjelberg kyrkje som er heile 300 år dette året. Den noverande Fjelberg kyrkje er ei langkyrkje frå 1722, bygd i tømmer og med 160 sitjeplassar.

Denne kyrkja erstatta den treskipa stavkyrkja som stod på nokolunde same staden. Det er ikkje funne bygningsrestar etter denne kyrkja, men denne er nemnd i kjende kjelder som omtalar kyrkja rundt 1360. Fjelberg stavkyrkje var truleg reist allereie på 1200-talet.

Fjelberg kyrkje ligg fint plassert på Fjelbergøy, i sundet mellom Borgundøy og Fjelbergøy. Her ligg også Fjelberg gamle prestegard som saman med kyrkja dannar ein fin heilskap.

Eit 300 års jubileum er verdt å markere, og Fjelberg og Eid sokneråd inviterer til festgudsteneste med samvær i prestegarden etterpå.

Biskopen i Bjørgvin, Halvor Nordhaug, prost Svein Arne Theodorsen, sokneprest Carsten Mrusek og fleire lokale prestar vil delta. Vi får også høyre kvartetten «Ære», leia av kantor Eva Megyesi.

På festsamvêret i den gamle prestegarden blir det høve til å kjøpe betasuppe, laga av lokale eldsjeler. Jubileumskaka er sjølvsagt også på plass.

Blant helsingar vil vi få høyre tidlegare prost i Drammen prosti, Astrid Bjellebø Bayegan, fortelje om oppvekstminne og konfirmasjonstid på Borgundøy/Fjelbergøy. Kvinnherad kommune vil bli representert ved Anne Sofie Bjelland Kjeka som også er busett i soknet.

Kyrkjeverje Torstein Aarthun vil gi oss eit lite tilbakeblikk over kyrkja si historie. Det går ferje frå Sydnes/Utbjoa med høvelege tider til gudsteneste og festsamvær. Fjelberg og Eid sokneråd ynskjer velkommen til jubileumsfeiring!

Heidi T. Sjo

Gunn Judith Dale

Fjelberg og Eid sokneråd