Fabrikksjefar kjem – og går

Tilsvar til Jon Ola Ystegaard, Hydro Husnes.

Eg vil takka Jon Ola Ystegaard for raskt – og utfyllande svar, men fekk eg eigentleg svar på det enkle spørsmålet mitt: «Har Hydro og/eller Hydro Husnes – no eller i framtida – planar om å bygge ut vindkraft i Kvinnheradsfjella?»

Svaret hans ligg skjult i det siste avsnittet. Der tek fabrikksjefen i bruk dei nye orda som skal vera svar på det meste: Ny fornybar som betyr vindkraft, og at Hydro Husnes vil bidra med det så lenge det er gjort gode konsekvensutredningar – og så lenge lokalsamfunnet stiller seg bak. (utheva av meg) Svaret hans kan ikkje tyda på noko anna måte enn at her ligg det føre planar. Kor langt dei er komne, har me så langt ikkje fått svar på.

Konsekvensutgreiing er det nye ordet frå utbyggingskåt vindindustri. Dei tilbyr seg no å gjere slike utgreiingar gratis til kommunane som er peika ut. Det er berre den ulempa at har ein kommune fyrst sagt ja til slik konsekvensutgreiing – og lar utbyggar står for det, er dei ferdig med heile prosessen. Då blir det korkje administrativt eller politisk noko hand på rattet som det så fint heiter. Dette er stadfesta i brev frå NVE til Motvind Norge. Dette ber eg dei folkevalde, og dei som står på val å merka seg.

Heilt til slutt i avsnittet viser Ystegaard til at lokalsamfunnet må stilla seg bak. Eg er difor glad for at eg før denne debatten kom opp, sendte eit langt orienterande brev til Jon Ola Ystegaard, som er ny i kommunen. Der fortalte eg han at det var Kvinnherad Turlag som starta motstandsarbeidet. At det er sterk motstand mot vindkraft i Kvinnherad. At det vart sendt 2000 høyringssvar til OED sin Samla plan frå Kvinnherad (av 5000 høyringssvar). Av høyringssvara var det mange frå bedrifter, og kultur og reiselivinstitusjonar.

Eg skreiv òg at det var våre folkevalde som sjølve laga høyringssvaret til Samla plan, og at dei ved tre seinare høve har sagt nei til vindkraft i Kvinnherad. (seinast 23.03.23) At tre ordførarar på rad har sagt nei – og ein av dei skreiv under på det landsomfattande «ordføraroppropet» i 2020. Eg skreiv òg at Kvinnherad er ein av kommunane som bidreg svært mykje med fornybar energi, over 3% til fellesskapet, og at tett på 90% av vassdraga våre er utbygde. Dette er vårt bidrag til det såkalla grøne skiftet, men oppgraderingar og modernisering av vasskrafta ønsker me velkommen.

Noverande ordførar seier ho sove godt om nettene som har oss som passar på fjella våre. (etter formannskapet 24.04.22) Eg har grunn til å tru at samtlege parti i kommunen går til val på nei til vindkraft i Kvinnherad til hausten. Noko anna vil vera heilt formasteleg. Eg har bede fabrikksjefen ta dette med seg inn til Hydrogjengen i Oslo.

Fabrikksjefen seier han teke ansvar for sine 350 tilsette. Klart det – det er han betalt for. Hydro Husnes skal produserast aluminium, sikra arbeidsplassane – å ikkje selja energi til høge prisar. Det vil nok òg vera eit godt kort å ha på hand når Hydro skal forhandla om nye og rimelege energikontraktar. Aluminium er viktig i det grøne skrifte, som Ystegaard seier.

Sjølv kjenner eg, og Aksjonsgruppa ansvar for fjell, natur og kystlandskap som 13.017 innbyggarar (pluss tilreisande) i kommunen er brukarar av – og som skal vera der for framtidas generasjonar. Fabrikksjefar kjem – og går. Fjella våre består!

Annemor Ekeland