Etter folkemøtet med Statnett og NVE

Var ikkje på møtet, men forstår at det var visst mest fokus på «avguden» Baroniet. Mykje verre for dei som får linjene rett utafor glasa, og nær husa. Eg trur avstanden før skulle vera 60 meter frå senter.

Eg trur ikkje mange har arga seg på linjene, men ta ein spørjerunde neste år når folk kjem ned att på parkeringa.

1: Hadde du reist hertil dersom du hadde visst om desse linjene?

2. Såg du linjene no?

3. Vart opplevinga di påverka av dette skrekkelege synet?

Eg har eit verre eksempel frå Austrepollen. Naboen fekk mastene rett framfor stoveglasa, med akkurat minimumsavstand. Fekk nokre lusakroner for det, men han hevda at det beslagla for eventuelle tomter. Svaret frå skjønsretten. «Kan ikke se at det noen gang vil bli bruk for tomter på en så avstengt plass». Dei tenkte nok ikkje lenger enn til neste dag, og det er no so, ingen kan sjå framtida. Erstatning kr. 0,00.

Få i kroppen

Skjønslova seier at ein skal ha erstatning for det tap ein lir. Og sjølv hadde eg induksjonsstraum i uthusa, cirka 100 volt. Og der er litt over minimumsavstand. Det var stor diskusjon i «gamle dagar» om det var helsefarleg, men det vart dyssa ned i det offentlege. Korrupsjon? I tettbygd strøk kunne det blitt dyrt å erstatta mange buplasser.

Vart ikkje dette nemnt på møtet? Og no skal spenninga verta mykje større, og då må avstandane mykje opp. Det du ser med augo er no ein ting, men det du kan få i kroppen er vel verre?

Johs. Bondhus