Endeleg er me i gang att!

I halvanna år har koronapandemien stukke kjeppar i hjula for planlagde møte i HVØ pensjonistlag. Tysdag 31. august startar me endeleg opp att! Og då med eit spennande kulturarrangement i samarbeid med Ølve Mållag. Det blir finfint besøk på Hatlestrand av antikvarbokhandlaren Arne-Ivar Kjerland og folkemusikaren Knut Hamre. I ord og tonar vil dei fortelje om forfattaren og folkeminnesamlaren Thrond Haukenæs som levde i Granvin mellom 1840 og 1922, ein viktig historisk periode om ein vil forstå framveksten av ein folkeleg norsk tradisjonskultur.

Arne-Ivar Kjerland, oppvaksen i Granvin, er ein sentral profil innanfor den nynorske skriftkulturen. I over tjue år var han disponent for nynorskavisa Dag og Tid. I 1989 var han sentral i oppbygginga av Nynorsk Antikvariat, og frå 2010 har han drifta sitt eige Nynorsk Antikvariat AS i bokbyen Tvedestrand. I alle desse åra har han vore ei kreativ drivkraft i antikvariatmiljøet, og henta inn markante føredragshaldarar til litteraturprogram i bokbyane Fjærland og Tvedestrand.

Sjølv er han ekspert på Thrond Sjurson Haukenæs, mannen som bygde opp hotell og dreiv forretning i Granvin, men gjekk konkurs i 1883. Deretter byrja han på den livsgjerninga som han verkeleg er blitt hugsa for. Haukenæs var ein engasjert og påliteleg samlar av eventyr og segner med Hardanger, Voss og Sunhordland som viktige nedslagsfelt, og var ein verdifull informant for m.a. Asbjørnsen og Moe. På 31 år skreiv han heile 51 bøker og reiste sjølv rundt i landet og selde dei. Interessa for livet og forfattarskapen til den mangfaldige samlaren har følgd Kjerland gjennom store delar av livet. Det første føredraget om Haukenæs heldt han i 1970. Sidan har det blitt mange kåseri og artiklar. Og i fjor kom boka Thrond Sjurson Haukenæs - mannen og verket. Boka har fått strålande kritikkar og vil vere til sals på møtet.

Granvin har hatt hardingfela i heradsvåpenet. Etter kommunesamanslåinga måtte vossingane ofre hjorten i våpenet sitt for hardingfela. Det seier mykje om den sterke posisjonen instrumentet og slåttetradisjonen har i desse bygdene. Haukanes var glad i felespel, og gjennom store delar av forfattarskapen hans finn Kjerland opplysningar om spelemenn, slåttar og segner knytte til desse.

Knut Hamre, også han frå Granvin, spelte hardingfele allereie som 10-åring. Sidan har livet hans handla om å spele godt og om å vidareføre tradisjonen til nye generasjonar. Hamre er kjend for sitt lyriske spel og har ei sjeldan formidlingsevne. Han har spelt til dans og på utallege kappleikar og konsertar. Han har spelt for kongen og dronninga og for amerikanarar på Metropolitan i New York. Han har gitt ut plater og Cd-ar, nokre i samarbeid med musikarar som Leif Rygg, Nils Økland, Åse Teigland og Benedicte Maurset. Han har fått Spelemannsprisen og Folkelarmprisen, og i 2017 vart han utnemnd til kommandør av St. Olavsorden for innsatsen sin for norsk folkemusikk.

På kulturarrangementet på Hatlestrand vil Hamre spele fleire av slåttane frå den musikkarven Haukenæs bar med seg i livet.

HVØ-pensjonistlag