Ein hovudristande ordførar?

Då eg les Grenda sitt referat frå det siste kommunestyremøtet, blei eg «øvegidde» og skuffa. Og ikkje berre litt! Under saka om budsjett og økonomiplan kunne vi lesa at vår fremste ombodsmann, ordføraren, sat og rista på hovudet under representanten Jostein Saghaug (MDG) sitt innlegg frå talarstolen. Ja, det kunne vi lesa!!

Det var mest så eg håpa at det som var skrive, var ein glipp av Grenda-redaktøren som refererte frå møtet. Det er det nok ikkje! Morten Nygård har gjennom åra som journalist vist seg som ein særs dyktig og truverdig referent.

Fann midlar til idrettshallen: – Må få piggskoa på seg

Eg vil tru at ordføraren ønskjer å hindra politikarforakt, men kva er det han viser ved slik framferd? Eg syntest det var på sin plass å reagera. Eg kunne nok ønskt at ordføraren beklaga oppførselen frå talarstolen i kommunestyresalen, og at han lovar at hovudristinga eller andre former for hersketeknikkar ikkje skal skje frå ordføraren heretter.

Våre folkevalde skal i alle fall behandlast med respekt i kommunestyresalen.

Uskedalen 11.01.25

Thor Inge Døssland