Ei stemme for Rosendal og området rundt

Rosendal bygdelag vart stifta 26. august 2019. Vi hadde folkemøte ved oppstart som gav retning for kva bygdelaget ser som viktig. Vi fekk over 300 innspel, og har funne fokusområde for kva gjer Rosendal bra og kva kan gjere Rosendal betre.

Fokusområda i 2019 er dei same som i dag. Det er viktig å ha eit trygt og godt sentrum for alle, med fokus på born sin tryggleik, sykkelstiar og stiar. Det må vere grønt fokus, med tilgang til natur og heilskap i planlegging. Rosendal har ein heilskap som må takast vare på og utviklast. Det må kome fleire møteplassar og leikeplassar i Rosendal sentrum. Alle som er i Rosendal må kunne ha tilgang til sjø, vassaktivitet og fjorden vår. Vi treng meir underhaldning i brei forstand, meir aktivitetar og område for frileik for born og unge. Særleg ungdomane i bygda må få meir plass.

Bygdelaget har hatt desse fokusområda som utgangspunkt for alle uttalar og arbeid. Tidlegare har vi uttalt oss i samband med områdeplan, kommunedelplan, andre planar, uttale til støtte for offentleg tannklinikk, mot vindmøller i Kvinnheradsfjella med meir. Vi har arbeidd med Prestabryggja, digital klokke, Tongabuo og parken langs elva med meir.

Arbeid no

I 2024 har vi arbeidd med fleire ting vi ser som viktige i møte med framtida til bygda:

* Bygdelaget vil avvise alle alternativa med høgspentliner gjennom Rosendal og i kanten av bygda, og vi krev at sjøkabel-alternativet må utgreiast.

* Vi har uttalt oss om at områdeplan og andre planar må vise stort fokus på born, tryggleik, utforming og utbygging i tråd med Rosendal sin arv og miljø. Ute-leikeplassar, bilfrie område og møteplassar er viktig. Vi vil at folk i området skal ha tilgang til fjorden, og at det skal vere mogeleg å gå tur langs fjorden frå Fjordhotellet til Gurinefjæro.

* Vi støttar arbeidet for å få på plass ny idrettshall i Rosendal. Bygda treng ein stad for aktivitet for store og små, særleg i vinterhalvåret, då dagens gymsal er kald og det lek i taket.

* Vi gler oss ilag med naboar, Rosendal turnlag og eldsjeler for at stien opp Svartedalen er under opprusting.

* Vi arbeider vidare for at Hestasletto skal bli eit statleg sikra friluftsområde, slik vi sende brev om til kommunen i 2020. Ting tek tid, men vi har tid.

* Vi arbeider vidare for at stupetårnet som vi var med og fekk bygd, må få ein flott plass til ungdommane våre i Rosendal (og til alle andre som tør!).

* Vi arbeider for at vasstrampolinen skal kome på vatnet igjen i 2025. Her treng vi avklaring om bygdelaget står personleg ansvarleg dersom nokon skadar seg på trampolinen. Arbeid med å få badstove er framleis i gang.

* Rosebed-gjengen er 10-12 personar som gler oss alle med flotte roser ved innkøyrsla til Skålagato frå nord. Takk for jobben de gjer!

* Rosendal bygdelag vil takke for godt samarbeid med Steinparken om lysløypa. Og tusen takk for tilskot til nye lyslenker frå Kvinnheradstiftinga!

* Vi held fram samarbeid med andre lag og organisasjonar i bygda og omegn, og takkar for flotte samtalar og samarbeid med Ungdomsrådet, Elevrådet ved Ungdomsskulen, FAU Rosendal FUS barnehage, FAU ved Malmanger skule, Steinparken, Rosendal helselag, Rosendal Utvikling, Rosendal Samfunnshus med fleire.

Vi ynskjer alle i bygda og håpar fleire vil vere med i bygdelaget, og inviterer til årsmøte 3. februar. God jul og godt nyttår!

Helsing Styret i Rosendal bygdelag