Det har noko å seie kven som styrer

Det har noko å seia kven som styrer kommunen vår. Sjølv om me kanskje ikkje tenkjer så mykje på det i det daglege, så påverkar det som skjer i kommunen oss kvar einaste dag. Når alt blir dyrare, har det noko å seia om dei som styrer meiner at ein skal klara seg sjølv, eller om ein meiner at me skal byggja sterke fellesskap.

Vatnet i springen, barnehagen og skulen barna våre går på, helsetilbodet til eldre, kulturlivet og fritidstilbodet, er berre nokre av områda kommunen har ansvar for. Mange har også kommunen som arbeidsgjevar. Derfor har det noko å seia kven som styrer kommunen.

Det har noko å seia for barnefamiliar om det vert prioritert gode barnehagar med nok tilsette. Det har noko å seia for barnefamiliane at skulen har nok lærarar. Det har noko å seia om barna får eit varmt måltid på skulen, leksefri skule og nok helsesjukepleiarar på jobb.

Dei siste fire åra har me vist at SV vil prioritera barna våre, og leggja til rette for ein skule der kvar elev blir sett og høyrt. I Kvinnherad har me vore pådrivar for å få like oppvekstkår for alle barn i kommunen og me har starta med gratis SFO og pilot heildagsskule på Hatlestrand.

Me vil skapa ein kommune der alle kan vera med på leiken, uavhengig av lommeboka til foreldra.

Det har noko å seia om dei som styrer vil kommersialisera helsetilbodet – det fører til at dei tilsette får dårlegare lønns- og pensjonsvilkår og ein tøffare jobbkvardag. Det har noko å seie om sjukefråværet går ned og du har fare ansikt og hender på institusjonane. SV vil ha trygge og faste stillingar og skapa ein heiltidskultur.

Det har noko å seia om dei som styrer vil prioritera velferd for alle, framfor private løysingar for dei som har råd til å betala for det. Om dei som styrer tenkjar at kvar og ein skal klara seg åleine, heller enn å skapa ein kommune med fellesskap, der ein får hjelp om ein fell utanfor.

Det har noko å seia for klimaet og miljøet kven som styrer kommunen vår. Om dei som styrer ukritisk vil byggja ned natur, skogsområde og matjord. Om hytteutbyggingar eller vindturbinar stadig får forrang framfor natur og artsmangfald. Natur- og klimakrisa er global, men me må handla lokalt.

Det har noko å seia om dei som styrer berre vil halda fram som ein alltid har gjort, og la miljøet tapa kvar einaste gong. Om ein ikkje prioriterer å få ned utslepp og sikra grøne arbeidsplassar.

Det har noko å seia kor partia vurderer å kutta når ein må spara. Det har vore gode tider i Kvinnherad, men med aukande gjeld til over 2 milliardar og lånerenter på snart 100 millionar årleg så vil me på eit punkt måtte spara. Kvar ein kuttar og kva ein vil prioritera av tenester då, der finn du store forskjellar mellom partia.

No kan du bestemma. Du kan satsa på eit parti som ikkje vil kutta i tenestene til innbyggarane, som vil satsa på dei tilsette, auka grunnbemanning i barnehage, skule, heimesjukepleie og sjukeheimane. Du kan satsa på eit parti som held ord og er tydlege på kva me vil. Sett du omsyn til menneske og miljø først er SV partiet for deg.

Silje Nordtveit Olsen

leiar og ordførarkandidat Kvinnherad SV