Budsjettet og turnusane

Slik vi oppfattar saka gjeld den turnusavtalar, der Fagforbundet Kvinnherad og kommuneadministrasjonen ikkje har klart å koma til semje, slik at det ikkje ligg føre ein lokal tariffavtale kring arbeidstid/turnus. Kommuneadministrasjonen har freista å løysa dette ved å inngå individuelle avtalar om arbeidstidsordningar. Fagforbundet meiner forslaga til turnusavtaler er urettferdige, og har råda medlemmene sine til å ikkje gå med på slike avtalar.

Den lokale raud-grøne samarbeidsplattforma mellom Sp, SF og Ap seier vi at vi ønsker å vise ei aktiv og konstruktiv rolle som arbeidsgjevar. Dei tilsette skal bli møtt av ein seriøs og inkluderande arbeidsgjevar. Ein skal bli høyrt og medverke i viktige prosessar. Det har gitt fleire konkrete utslag i arbeidsgjevarpolitikken til kommunen, og det kan her til dømes nemnast:

- Vi har bestemt at administrasjonsutvalet, som i førre periode var eit tilnærma «sovande» organ, skal ha ei aktiv rolle og vere eit forum der politikarar og fagorganisasjonar møtes for å utforme god arbeidsgjevarpolitikk i fellesskap.

- Vi bestemte allereie i det første budsjettet vårt at hovudverneombod skal ha heil stilling.

- I 2020-budsjettet og i budsjettet for 2021 er denne raude tråden følgt opp vidare, ved at vi i verbalpunkta ber administrasjonen prioritere samarbeid med fagforeiningane, og at ein har kravd prosjekt for å etablere ein heiltidskultur, slik at alle som ønsker det skal få full stilling og ei lønn å leve av. Vi har bestilt ei utgreiing om lokalt vikarbyrå. Vi trur ei slik nytenking og nyorganisering kan føre til auka trivsel, redusere sjukefråværet og auke samhandlinga mellom arbeidsgjevar og arbeidstakar

Vi er noko undrande over måten politiske vedtak har blitt omsett til praktiske avgjersler, slik som bakgrunnen for den situasjonen ein no har mellom Fagforbundet og kommuneadministrasjonen Uavhengig av kva formelt handlingsrom administrasjonen har til å manøvrere i, er det ikkje samsvar med den raud-grøne samarbeidsplattforma og koalisjonen sine budsjettvedtak dersom vi skulle koma til å forlata normalordninga med kollektive forhandlingar ved sakleg usemje. Usemja i denne konkrete situasjonen er at turnusane til sjukepleiarane og helsefagarbeidarane ikkje blir likebehandla.

Administrasjonen hevdar at nye turnusar med reduksjon i tal årsverk er ein direkte konsekvens av kommunestyret sitt vedtekne budsjett for 2021. Det er i beste fall ei mangelfull forklaring. Kommunestyret stemmer over økonomiske rammer til kvar sektor. I tillegg legg vi ved verbalpunkt som ei presisering til kommunedirektøren, for å forklare kva politikarane vil at ho skal prioritere innanfor rammene. Mellom anna tok vi i inneverande budsjett ut kommunedirektøren sitt forslag om innsparingar på institusjonane ved hjelp av pleiefaktor, og la inn ei generell innsparing på sektornivå saman med eit verbalpunkt om innsparingar på leiarstillingar og merkantile kostnadar. Reduksjonen er såleis ein direkte konsekvens av sektoren sine prioriteringar – ikkje budsjettet.

Administrasjonsutvalet vart orientert om konflikten mellom administrasjonen og Fagforbundet i møte den 16.03. Av protokollen går det fram at utvalet uttala seg slik:

«Administrasjonsutvalet oppmoda partane om å finne ei løysing og peikar på at trepartssamarbeidet er ein del av verbaldelen i budsjettvedtaket og ein forventar at administrasjonen føl opp dette i det vidare arbeidet. Arbeidsgjevar og fagforeiningane er likeverdige partar i forhandlingane som pågår.»

Om turnusarbeid

Å jobbe til ulike tider på døgeret, helg og høgtid vert vurdert som så krevjande at arbeidsgjevar og fagforeiningar nasjonalt har tariffesta at ei arbeidsveke skal vere på 35,5 timar. Altså to timar færre enn dagarbeid som har 37,5 timars arbeidsveke. Arbeidsgjevar og fagforeining kan gjere avtale om å gjennomsnittsberekne arbeidstida i ein turnus slik at ein t.d. jobbar fire dagar ei veke og seks dagar neste veke.

At arbeidsdagen varer 7,5 timar er eit rimeleg krav. Det same er kravet om å ta pause i løpet av arbeidsdagen. Det framstår for oss underleg å rekne snittet for sjukepleiar/vernepleiar og fordele vaktene over 28 dagar medan hjelpepleiar/fagarbeidar får timane sine fordelt slik at dei skal jobbe 29 dagar i same perioden.

Koalisjonen ser at konfliktnivået er blitt så høgt at vi, gruppeleiarane for samarbeidspartia, vil be ordføraren kalle inn til eit ekstraordinært formannskapsmøte i veka etter påske for å bli orienterte om konflikten og finne ut korleis vi kan komme på rett spor. Vi ønsker å gjenoppretta dialogen med Fagforbundet og bli den arbeidsgjevaren vi har ambisjonar om at Kvinnherad kommune skal vere.

Gruppeleiarane i koalisjonen

Leiv Ove Mikkelsen (Ap)

Gunnar Våge (Sp)

Hege Lægreid Røssland (SF)