Birger Myklebust til minne

Dei siste par åra har vi mista fleire av dei gode kjeldepersonane til lokalhistorieserien «Den nære fortida». Fredag kom meldinga om at ein av desse, Birger Myklebust, var gått bort.

Birger blei 91 og eit halvt år. Desse munnlege kjeldene har vore heilt avgjerande for at serien har blitt ein slik suksess. I tillegg til sjølve innhaldet, har dei med forteljingane sine medverka til framstillingsforma og nærleiken til stoffet som vi har fått så mykje ros for.

Birger har vore hovudkjelde til fleire artiklar i dei to første bøkene, og i tillegg har han gitt krydrande drypp til mange andre artiklar. I den tredje boka som kjem ut i november, er han hovudkjelde til to artiklar. Han var opphavsmann til det store idrettsarrangementet Strandstafetten saman med vennen Torfinn Myklebust. Ideen blei sådd under eit kafèmåltid i Bergen då begge budde der. Dette blei eit suksessarrangement i sentrum av Uskedalen kvar 1. mai i meir enn 25 år.

Birger var glad i fjellet, og spesielt skiaktivitetar. Saman med brørne Gjert og Tor var han også kjend for å arrangera kreative og artige konkurransar både på fjellet og nede på Neset. I den komande boka deler han minne frå både livet ved Mannsvatnet og frå Strandstafetten. (Biletet er henta frå boka som kjem. Birger viser fram eit krus med bilde av ungdomsgjengen som stod for bygginga av Nesjahytto).

Rikhaldig fotosamling

Det var alltid kjekt å koma til Birger når vi ville vita meir om den nyare Uskedalshistoria. Han hugsa svært godt, og i tillegg hadde han ei levande forteljarevne, ofte krydra med humor. Det var så kjekt å lytta til. Det var tydeleg at han sette stor pris på desse stundene der han kunne fortelja om alt mogeleg som hadde skjedd i Uskedalen. Humøret var alltid stigande utover i samtalen, latteren sat laust, besøka vart alltid lengre enn planlagt, og eg var alltid så fornøgd når eg gjekk ut døra frå orakelet i Geilo.

Han kunne ikkje berre fortelja. Han hadde også ei rikhaldig fotosamling som vi fekk bruka fullt og heilt i arbeidet. Også dette har vore av uvurderleg verdi for bokarbeidet vårt.

Det er ein god medarbeidar som no er borte. Sjølv om Birger no ikkje er blant oss lenger, vil det koma ord frå hans munn i komande bøker i serien, i artiklar som alt er nokolunde ferdigskrivne.

Vi har mange gode minne frå samarbeidet med Birger. Desse skal vi ta godt vare på, og vi lyser fred over minnet etter Birger.

Uskedal Historielag

Thor Inge Døssland