Årsmøte i LHL

Arbeidet i ideelle organisasjonar må gå sin gang, trass i pandemien. LHL Kvinnherad har halde årsmøte, rett nok noko forseinka. I år var møtet i Kinosalen på Husnes med om lag 35 frammøtte.

Før møtet underheldt ei gruppe ungdomar frå Kvinnherad Musikkskule med vakker marimbamusikk.

Naturleg nok har pandemien prega arbeidet i organisasjonen det siste året. Så å seia all aktivitet i laget vart stansa i mars i fjor. Noko kom i gang att i august. Ei viktig oppgåve for laget er å laga til møteplassar for medlemene. Det er mykje god helse i å kunna treffa kjende og gode vener. Festkomiteen har skipa til grillfest ved Golfhuset på Husnes. Mange sette pris på denne samkoma. Lagsmøta kom og i gang, men i oktober vart det på nytt bråstopp. Større samlingar måtte avlysast, m.a. tradisjonelle aktivitetar som turar, Sunnhordlands-treffet, basar og julebord. Lagsmøta måtte ta pause ut året.

Men styret har likevel arrangert fleire kurs, og tre medlemsmøte siste året. På desse møta har eigne krefter og lokale ressurspersonar bidrege.

Laget har to velfungerande mat- og serveringsgrupper som syter for fin servering på medlemsmøta.

På arbeidsstova var deltakarar samla seks gonger i fjor, i gjennomsnitt

15 var med kvar gong. Ikkje minst under smitteutbrotet har desse samlingane vore ein viktig møteplass for dei som var med. Varmebassenget stengde i mars i fjor, til då hadde LHL hatt ti samlingar der med til saman 147 deltakarar, med trening kvar torsdag under leiing av Olav Johnsen.

Ruslegruppa held det gåande, deltakarane møtest kvar torsdag og ruslar i parken anten veret er vått eller solblankt. Dette tiltaket kom i gang i staden for kurset i varmebassenget. Innandørs trimkurs var stengt frå mars til august, men det vart likevel avvikla 28 økter, og til saman 318 personar var med.

LHL inviterer og til rusletur om tysdagane, 28 turar i alt, og 561 personar har vore med. Fram til mars i fjor kunne interesserte møtast og spela brigde, men også det tiltaket måtte stengjast. LHL har ikkje skipa til dansetrim i 2020, det har òg samanheng med smittevernet.

Laget har god økonomi, overskotet i rekneskapen for fjoråret vart 99.396,51 kroner. Laget har fått kompensert frå staten godt og vel 52.000 kroner som er bortfall av inntekt på den årlege basaren. Ei anna god inntektskjelde er grasrotandelen, som skaffa laget nær 30.000 kroner i fjor.

Etter årsmøtet held Synnøve Grude fram som leiar i LHL i Kvinnherad. Dei andre i styret er Ingunn Gudding, Roald Teigen, Willy Olufsen og Ann Karin Bekvik. Varafolk i styret er Kristi M. Stråbø, Grethe Handeland og Astrid Storhaug.

Sjur Tjelmeland